Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 565 Hüküm no: 690 Orijinal metin no: [120b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Todoş v. Tanaş’ın gemi malzemelerinin iadesi için Memiş Reis b. Hasan’a tembih Mahmiye-i İstanbul’da Fenerkapısı kurbunda Abdi Subaşı mahallesinde sâkin sefîne reislerinden işbu râfi‘ü’l-vesîka Todoş v. Tanaş nâm zimmî meclis-i şer‘-i şerîf-i enverde Havâss-ı Aliyye kazâsı müzâfâtından Terkos nâhiyesi’ne tâbi‘ Ağaçlı nâm karye sükkânından Memiş Reis b. Hasan mahzarında üzerine da‘vâ ve takrîr-i kelâm edip târih-i kitâbdan beş ay mukaddem karye-i mezbûre önünde sefînesi karaya düşüp pârelendikde [121a] deryâdan ihrâc eylediğim beş aded sefîne …? ta‘bîr olunan beş halat ve sâire sefîne âlâtımı kendiden istîcâr eylediğim mahzende hıfz etmek için mezbûr Memiş Reis’e bi tarîki’l-emâne def‘ ve teslîm edip ol dahi ahz u kabz etmişidi hâlâ eşyâ-i mezbûrenin a‘yânı elân mevcûd olmağla suâl olunup merkūm Memiş Reis cevâbında fi’l-hakīka kaziyye merkūm Todoş’un takrîr-i meşrûhu üzre olup târih-i mezkûrda beş aded sefîne … ve kamane? ta‘bîr olunur beş halat ve sâir sefîne âlâtını mahzen-i mezkûrda hıfz etmek için müdde‘î-i mezbûrdan bi tarîki’l-emâne ahz u kabz edip eşyâ-i mezkûrenin elân a‘yânı mevcûd idiğini tâyi‘an ikrâr etmeğin mûcebince eşyâ-i merkūmeyi mahallinde müdde‘î-i mezbûra teslîme merkūm Memiş Reis’e tenbîh olunup mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Hüseyin Çelebi b. Mehmed, Mehmed Çelebi b. İdris, Hasan b. Mehmed.