Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 565 Hüküm no: 691 Orijinal metin no: [121a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Apostol v. Angeli’nin Kâtib Ali Efendi Vakfı’ndan aldığı ödüncü kefilin ödemesi Mahmiye-i İstanbul’da merhûm Kâtib Ali Efendi vakfına bi’l-fi‘l mütevellî olan işbu râfi‘ü’l-kitâb el-Hâc Yusuf Ali meclis-i şer‘-i şerîf-i enverde mahmiye-i mezbûrede Mirahor mahallesinde sâkin Papa Paskal v. Dimitri nâm zimmî muvâcehesinde üzerine da‘vâ ve takrîr-i kelâm edip yine mahalle-i mezbûre sükkânından gāib ani’l-meclis Apostol v. Angeli nâm zimmîye asl-ı mâl-ı vakf-ı mezbûrdan yüz yirmi esedî guruş bi’t-tevliyye idâne ve teslîm ol dahi istidâne ve kabz edip meblağ-ı mezbûr yüz yirmi guruşa merkūm Papa Paskal emr ve kabûlü hâviye kefâlet-i sahîha ile kefîl olmağın hâlâ suâl olunup meblağ-ı mezbûr yüz yirmi guruşu kefâletine binâen edâya mezbûra tenbîh olunmak matlûbumdur dedikde gıbbe’s-suâl mezbûr Papa Paskal cevâbında fi’l-hakīka kaziyye vech-i muharrer üzre olup müdde‘î-i mezbûrun gāib-i merkūm Apostol’e bi’t-tevliyye idâne ve teslîm eylediği meblağ-ı mezbûr yüz yirmi guruşa emr ve kabûlü hâviye kefâlet-i sahîha ile kefîl olup meblağ-ı merkūm yüz yirmi guruş bi hükmi’l-kefâle zimmetimde lâzımü’l-edâ deynimdir deyû tâyi‘an ikrâr etmeğin mûcebince meblağ-ı mezbûr yüz yirmi guruşu bi hükmi’l-kefâle mütevellî-i mezbûra edâya merkūm Papa Paskal’a tenbîh olunup mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed b. İdris, Hasan b. Mehmed, Ali b. Hâlid, Receb b. Mehmed.