İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 390 Hüküm no: 424 Orijinal metin no: [170-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bank-ı Osmani İdaresi’ne yapılacak tebligat için bunların çalışma saatlerine dikkat edilmesi Nezâret-i Umûr-ı Mâliye Düyûn-ı Umûmiye Muhâsebesi 315 Ma‘rûz-ı bende-i dîrîneleridir, Bank-ı Osmânî İdâresi kalemleriyle vezneleri sabahleyin alafranga sâ‘at ondan ba‘de’z-zuhr sâ‘at dörde kadar küşâde olup sâ‘ati bir usûle tâbi‘ olan vezneler bir def‘a kapandıktan sonra ertesi sabah ta‘yîn olunan vakitden evvel açılamayacağı cihetle te’diyât için vâki‘ olacak emirler geç vakit teblîğ olunduğu hâlde bi’l-mecbûriye ertesi güne ta‘lîk edilmek lâzım geleceği gibi vilâyâta mahsûs evâmir-i telgrafiye dahi usûl-ı mukarrere-i muhâbereye vâkıf me’mûrînin azîmetinden sonra irsâl edilemeyerek aynı teahhura dûçâr olmakta bulunduğundan o gibi evâmirin bankaya vakt ü zamanında teblîği Bank-ı [171] Osmânî’den bu kere alınan mektûbda beyân ve iltimâs edilmekle bir gûne teahhurât vâki‘ olmamak üzere te’diyât ve teblîgāt emirlerinin ta‘yîn ve beyân olunan sâ‘atlerden evvel ve sonraya kalmayacak bir zamanda teblîği zımnında iktizâsının îfâ buyurulması bâbında emr u fermân hazret-i veliyyü’l-emrindir. Fî 19 Receb sene 327 ve fî 23 Temmuz sene 325. Mâliye Nâzırı Nâmına Müsteşâr Rıfat Hülâsa-i meâl: Bank-ı Osmânî İdâresi’ne vukū‘ bulacak teblîgātın devam sâ‘atleri nazar-ı i‘tibâra alınarak icrâsı iktizâ edeceğine dâir.