İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 390 Hüküm no: 425 Orijinal metin no: [171-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Semave kazası niyabetinin münakahat izinnamelerine ait ilmühaberleri pulsuz kabul etmesinin kanuna aykırı olduğu Bâb-ı Fetvâ Dâire-i Meşîhat-i İslâmiye Mektûbî Kalemi Aded: 7 Fazîletlü Efendim Hazretleri, Semave kazâsı niyâbeti? tarafından münâkahât izinnâmelerine müte‘allik mahallât ilmühaberlerinin pulsuz olarak kabûl edilmekde olduğu lede’l-ihbâr icrâ kılınan tahkīkātdan anlaşılmış olduğu beyânıyla ba‘de-ezîn Damga Kānûnu ahkâmının tamamî-i tatbîk ve icrâsına i‘tinâ ederek muhâlif-i kānûn evrâkın istilzâm eyleyeceği cezâ-yı nakdîden mesûl olanlar hakkında hükm-i kānûnun îfâsında tecvîz-i müsâmaha eylememeleri zımnında hükkâm-ı şer‘iyeye teblîgāt icrâsına dâir Düyûn-ı Umûmiye Komiserliği’nden vârid olan tezkire üzerine Meclis-i İntihâb-ı Hükkâm ifâdesiyle Dersa‘âdet Mehâkim-i Şer‘iyyesiyle merâkiz-i vilâyât ve elviye-i gayr-ı mülhaka niyâbet-i şer‘iyelerine ta‘mîmen teblîgāt îfâ kılınmış olmağla îfâ-yı muktezâsına himmet olunması siyâkında tezkire-i muhlisî terkīm olundu efendim. Fî 9 Şa‘bân sene 1327 ve fî 13 Ağustos sene 1325. Şeyhülislâm Sahib