Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 566 Hüküm no: 692 Orijinal metin no: [121a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sultana bt. tülbentçi Asvador’un menzil davasının on beş sene geçtiği için reddi Mahmiye-i İstanbul’da Sulu Manastır mahallesinde sâkin iken hâlik olan tülbentçi Asvador v. Haccan nâm Ermeni’nin verâseti zevce-i metrûkesi Maryem bt. Avadik nâm Ermeniye ile sulbî oğulları Bogos ve Bedros ve sulbiye kızı Sultana’ya münhasıra olup ba‘dehû mezbûr Bogos dahi hâlik olup verâseti zevce-i metrûkesi Marta bt. Karabet nâm Ermeniye ile sulbiye kızları Şahzâde ve Gül ve Harpasima ve Gevher’e ve li ebeveyn karındaşı mezbûr Bedros’a münhasıra olup ba‘dehû mezbûre Şahzâde dahi hâlike olup verâseti zevci Elmas v. Andriyas ile anası mezbûre Marta’ya ve sadrî sagīr oğlu Tarabyon ve sagīre kızları diğer Sultana ve Nöri ve Eziz’e münhasıra olduğu şer‘an zâhir ve müte‘ayyin oldukdan sonra hâlik-i evvel-i mezbûrun kızı mezbûre Sultana meclis-i şer‘-i şerîf-i enverde kendi tarafından asâleten ve sıgār-ı mezbûrûnun babaları olmağla velâyeten ve mezbûre Marta tarafından husûs-ı âti’z-zikre sâbitü’l-vekâle vekîl olmağla vekâleten zikri âtî menzile vâzı‘ü’l-yed olduğu sâbit olan mezbûr Elmas mahzarında üzerine da‘vâ ve takrîr-i kelâm edip babam hâlik-i evvel-i mezbûr Asvador’un terekesinden olup mahalle-i mezbûrede vâki‘ bir tarafdan ocakçı Bâli mülkü ve bir tarafdan bozacı Murad mülkü ve bir tarafdan ba‘zan Nurses ve ba‘zan Kasbar mülkleri ve bir tarafdan tarîk-i âm ile mahdûd büyût-ı adîdeyi müştemil mülk menzile mezbûr Elmas ber vech-i muharrer vâzı‘ü’l-yed olmağın suâl olunup menzil-i mezbûrdan bana isâbet eden hisse-i şer‘iyyemden kasr-ı yed ve bana teslîme mezbûr Elmas’a tenbîh olunmak matlûbumdur dedikde gıbbe’s-suâl mezbûr Elmas cevâbında müdde‘iye-i mezbûre Sultana babası hâlik-i mezbûrun terekesinden olan mârrü’z-zikr menzilden hisse-i şer‘iyyesini bin altmış altı senesinde karındaşı hâlik-i mezbûr Bogos’a hayâtında on iki bin akçeye bey‘ ve teslîm [121b] ve kabz-ı semen etmişidi ve mezbûr Asvador bin elli beş senesinde hâlik olup târih-i mezkûrdan beri verese-i mezbûrûn mahalle-i mezbûrede müdde‘iye-i merkūme medîne-i Galata’da sâkinler olup dâimâ birbirine mülâkī olurken mezbûre Sultana husûs-ı mezbûra müte‘allika verese-i mezbûrûndan aslâ bir nesne da‘vâ etmeyip kırk iki seneden beri bilâ-özr-i şer‘î sükût etmişdir deyicek gıbbe’l-istintâk mezbûre Sultana, fi’l-hakīka babası mezbûr Asvador bin elli beş senesinde hâlik olup târih-i mezkûrdan beri kendi medîne-i Galata’da verese-i mezbûrûn mahalle-i mezbûrede sâkinler olup dâimâ birbirine mülâkī olurken husûs-ı mezbûra müte‘allika verese-i mezbûrûndan aslâ bir nesne da‘vâ etmeyip kırk iki seneden beri bilâ-özr-i şer‘î sükût eylediğini bi tav‘ihâ ikrâr ve i‘tirâf etmeğin mûcebiyle on beş sene bilâ-özr-i şer‘î terk olunan da‘vânın bilâ-emr istimâ‘ı memnû‘ olmağla müdde‘iye-i mezbûre Sultana bilâ-emr bî-vech mu‘ârazadan men‘ olunup mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Davud Çavuş el-Mübâşir, Mustafa Çelebi b. Abdurrahman, İbrahim Çelebi b. Ahmed, Mehmed b. İdris, Receb b. Osman.