İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 391 Hüküm no: 426 Orijinal metin no: [171-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Süveyş’ten Mısır, Hicaz ve Yemen’e yazılan telgrafların Beyrut’tan posta ile gönderilmesi Bâb-ı Âlî Dâire-i Umûr-ı Dâhiliye Mektûbî Kalemi Aded: 28 Taraf-ı Âlî-i Meşîhat-penâhî’ye, Ma‘rûz-ı bende-i dîrîneleridir ki, Süveyş telgraf me’mûrlarının Türkçeye adem-i vukūflarından dolayı Süveyş’den posta ile Hicaz ve Yemen’e îsâl edilmek üzere Dersa‘âdet devâir-i merkeziyesinden keşîde olunan telgrafnâmelerin meâli anlaşılmayacak bir sûretde vâsıl ve tashîhi de gayr-ı kābil olmakta bulunduğundan ve Beyrut’dan Cidde ve Hudeyde’ye haftada dört posta vapuru hareket etmekte bulundukları cihetle buradan keşîde olunacak telgrafnâmelerin Beyrut’dan posta ile Hicaz ve Yemen’e îsâli ciheti ihtiyâr olunduğu takdîrde hem suhûlet hâsıl hem de Mısır idâresine ücret i‘tâsı mecbûriyeti zâil olacağından bahis ile ba‘de-ezîn Yemen ve Hicaz kıt‘alarına çekilecek telgrafnâmelerin bâ-posta “Beyrut’dan posta ile” ibâresinin tahrîri muvâfık-ı maslahat ve menfa‘at olacağı Posta ve Telgraf Nezâreti Vekâleti’nden bâ-tezkire bildirilmiş ve bu sûret bi’t-tensîb devâir-i merkeziyeye teblîgāt icrâ edilmiş olmağla dâire-i celîle-i fetvâ-penâhîlerince de bu vech ile icrâ-yı îcâbı husûsuna müsâ‘ade-i aliyye-i meşîhat-penâhîleri sezâvâr buyurulmak bâbında emr u fermân hazret-i men-lehu’l-emrindir. Fî 23 Cemâziyelâhire sene 327 ve fî 28 Haziran sene 325. Dâhiliye Nâzırı Ferid