İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 396 Hüküm no: 434 Orijinal metin no: [174-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dersaadet’deki mülkiye ve inzibatiye muamelelerinin yeni kurulan İstanbul vilayetiyle muhabere olunması Emniyet-i Umûmiye Müdîriyeti Tahrîrât Kalemi Aded: 49 Dersa‘âdet mu‘âmelât-ı mülkiye ve inzibâtiyesinden dolayı İstanbul vilâyetiyle muhâbere olunması lâzım geleceğine dâir. Bâb-ı Vâlâ-yı Meşîhat-penâhî’ye, Mukaddemâ dahi arz ü iş‘âr olunduğu vechile Emniyet-i Umûmiye Müdîriyeti mülgā Zabtiye Nezâreti’nin munhasıran idâre-i zâbıta ve umûr-ı inzibâtiye ta‘alluk eden vezâifi îfâya me’mûren teşekkül etmiş ve İstanbul ve mülhakātı dâiresi bir vilâyet i‘tibâr olunarak İstanbul vilâyeti teşkîl buyurulmuş olmasına ve her vilâyetin dâhil-i dâire-i idâresi bulunan memâlik-i umûr-ı mülkiye ve inzibâtiyesi me’mûrîn-i mahsûsası vâsıtasıyla o vilâyet makāmına râci‘ olup Emniyet-i Umûmiye Müdîriyeti’nin Polis müdîriyetlerine merci‘iyeti idâre-i umûmiye-i zâbıtaya nezâretden ve onu tanzîm ve tahrîkden ibâ[r]et? bulunduğuna binâen Dersa‘âdet mesâlih-i câriye-i mülkiyesinin sâir vilâyâtda olduğu gibi devâir-i mahsûsası ve zâbıta-i idâriyesine ta‘alluk eden husûsâtın da İstanbul Polis Müdîriyeti ma‘rifetiyle rü’yet ve tesviyesi İstanbul vilâyetinin vezâif-i asliyesinden bulunduğundan bu gibi mesâlih-i müteferri‘a-i idâreden dolayı Emniyet-i Umûmiye Müdîriyeti’ne mürâca‘at usûl-ı merci‘iyet ve salâhiyete münâfî olduğu cihetle ba‘demâ Dersa‘âdet mu‘âmelât-ı mülkiye ve bi-hasebi’l-idâre umûr-ı zâbıtasına âid husûsâtdan dolayı İstanbul vilâyetiyle icrâ-yı muhâberât olunup polis heyet-i mecmû‘asının vezâif-i mürettebe-i umûmiyesince muhâfaza-i intizâmıyla emn ü âsâyişin te’mîn-i istikrârına ta‘alluk edecek tedâbîr ve mesâil-i umûmiyeden mâ‘adâ ahvâlde bir gûne muhâbere ve vesâtata merci‘ olamayacağı derkâr olan Emniyet-i Umûmiye Müdîriyeti’ne mürâca‘at buyurulmamak sûretiyle takdîm-i mu‘âmele ve ta‘yîn-i merci‘-i muhâbere buyurulmasına müsâ‘ade-i [175] meşîhat-penâhîleri sezâvâr olması ma‘rûzdur. Fî 6 Teşrîn-i evvel sene 325. Emniyet-i Umûmiye Müdîri Galib