Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 567 Hüküm no: 693 Orijinal metin no: [121b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın İbrahim b. Mustafa’da olan mehir ve nafaka alacağını tahsil ettiği Mahmiye-i İstanbul’da Mesih Hasan Paşa mahallesinde sâkine olup zâtı Ahmed b. Mustafa ve Mehmed b. Ali ta‘rîfleriyle mu‘arrefe olan Ayşe bt. Abdullah meclis-i şer‘-i şerîf-i enverde zevc-i mutallıkı bâ‘isü hâze’l-kitâb İbrahim nâm kimesnenin babası ve tarafından husûs-ı âti’l-beyâna vekîl-i müsecceli olan Mustafa b. Ahmed nâm kimesne mahzarında bi tav‘ihâ ikrâr-ı tâm ve takrîr-i kelâm edip zevcim mezbûr İbrahim bundan akdem beni bâyinen tatlîk etmekle zimmetinde mütekarrir ve ma‘kūdun-aleyh olan beş yüz akçe mehr-i müeccelim ile nafaka-i iddet-i mu‘ayyenem ve me’ûnet-i süknâm için bi’t-terâzî dört yüz yirmi akçe ki cem‘an dokuz yüz yirmi akçe hakkımı vekîl-i mezbûr Mustafa bana edâ ve teslîm ben dahi tamâmen yedinden ahz u kabz eyledim ba‘de’l-yevm zevcim mezbûr İbrahim zimmetinde bir akçe ve bir habbe hakkım bâkī kalmadı dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Ahmed Beşe b. Mustafa, Mehmed Beşe b. ( ) Çukadâr, Receb Beşe b. ( ), İbrahim Çelebi b. Ahmed, Hüseyin b. Mustafa, Ali Beşe b. Bâli, Mehmed Çelebi b. İdris.