İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 401 Hüküm no: 440 Orijinal metin no: [177-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hava değişikliği alanlar ile muhakeme sonucu beraat eden memurlara yarım maaş verilmesi Bâb-ı Âlî Dâire-i Sadâret-i Uzmâ Mektûbî Kalemi Aded: 133 Taraf-ı Vâlâ-yı Hazret-i Fetvâ-penâhî’ye, Ma‘rûz-ı bende-i dîrîneleridir ki, Tebdîl-i hava zımnında me’zûniyet istihsâl edenler ile ba‘de’l-muhâkeme berâet eden me’mûrîn vekîllerine verilecek humus maâşdan mütebâkīsinin kendilerine i‘tâsı ki mukarrerâtın mesâlih-i zâtiyelerinin tesviyesi için me’zûn olanlar maâşâtına dahi şâmil tutulup tutulmayacağına dâir istifsârı hâvî Defter-i hâkānî Nezâret-i Aliyyesi makāmından bi’l-vürûd Şûrâ-yı Devlet’e havâle edilen tezkire üzerine Hey’ât-ı Umûmiye’den i‘tâ kılınan mazbatada bir me’mûr iki sûretde me’zûn olabilir, biri hastalanarak tedâvi ve tebdîl-i havaya ihtiyâcı etibbâ tarafından varaka-i resmiye ile tasdîk olunması üzerine müddet-i münâsibe ile me’zûniyet verilen me’mûrîn olarak bunlara Harcırâh Karârnâmesi’nin on üçüncü maddesi mûcebince müddet-i me’zûniyetinde tamam ve kısm-ı diğerine gelince o da zâtına âid mesâlihi tesviye etmek üzere bir müddet-i mu‘ayyene ve muvakkate ile merkez-i me’mûriyetinden tebâ‘üd eden veyâ men‘-i şahsiyeden dolayı muvakkaten bir mahalle celb olunan me’mûrlar olup bunlara da yevm-i hareketlerinden mahâll-i me’mûriyetlerine avdet ve muvâsalatlerine kadar yine karârnâme-i mezkûrun on dördüncü maddesi mûcebince nısf maâş i‘tâ olunmakta ve taht-ı muhâkemeye alınan me’mûrîne tetimme-i muhâkemede tamamen berâet-i zimmetleri tebeyyün ile me’mûriyetlerine iâde olundukları hâlde karârnâmenin altıncı madde-i mu‘addelesine tevfîkan kezâlik nısf maâş verilmekte olmasına ve irâde-i seniyyeye iktirân eden karârnâme-i mezkûr hükmüne mugāyir olarak evvel ve âhir ittihâz olunup irâde-i seniyyeye iktirân etmediği cihetle kānûn hüküm ve kuvvetini hâiz olmayan mukarrerât-ı sâlifenin hâl-i hâzırda mer‘iyyet-i ahkâmı câiz olamayacağı gibi me’mûrîne senede bir müddet me’zûniyet i‘tâsı hakkında derdest tanzîm olan kānûnun men‘-i icrâya vaz‘ında her me’mûrun müddet-i me’zûniyeti esnâsında husûsât-ı zâtiyesini tesviye etmesi mümkün olacağına binâen mesâlih-i zâtiyelerinin tesviyesi için me’zûn olanlar maâşlarının da kānûnen me’zûn olacakları müddet hâricinde ber-mûceb-i nizâmnâme nısf olarak i‘tâsı zımnında ta‘mîmen devâir-i merkeziyeye teblîgāt îfâsı ve vilâyât ile elviye-i gayr-ı mülhakaya da o sûretle iş‘âr-ı keyfiyet olunmasının Dâhiliye Nezâret-i Aliyyesi’ne havâlesi ekseriyetle tezekkür edildiği gösterilmiş ve mûcebince îcâbı icrâ kılınmış olmağla Dâire-i Celîle-i İlmiyece de ber-vech-i tezekkür îfâ-yı muktezâsı bâbında emr u irâde hazret-i menlehu’l-emrindir. Fî 9 Şa‘bân sene 1327 ve fî 12 Ağustos sene 1325. Sadrıa‘zam Hüseyin Hilmi