Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 568 Hüküm no: 694 Orijinal metin no: [121b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hacı Yusuf b. Hacı Ömer’e borcu ödemesi için Sirozlu Mustafa Çelebi b. Hüseyin’e tembih Mahmiye-i İstanbul’da Sâlih Paşa mahallesi sükkânından el-Hâc Yusuf b. el-Hâc Ömer’in karındaşı ve tarafından husûs-ı âti’l-beyâna vekîl olduğu Ahmed Çelebi b. İbrahim ve Hasan b. Mevlüd şehâdetleriyle şer‘an sâbit olan el-Hâc İsmail nâm kimesne meclis-i şer‘-i şerîf-i enverde mahmiye-i mezbûrede Topkapısı kurbunda sâkin Sirozlu Mustafa Çelebi b. Hüseyin mahzarında üzerine da‘vâ ve takrîr-i kelâm edip bundan akdem müvekkil-i merkūm el-Hâc Yusuf kasaba-i Tekfurdağı’nda mezbûr Mustafa Çelebi doksan guruşunu ikrâz ve teslîm ol dahi iktirâz ve kabz ve mukābelesinde işbu orta boylu açık kaşlı sarı ala gözlü Rûsiyyetü’l-asl Rukiye nâm câriyesini müvekkil-i merkūma rehin vaz‘ ve teslîm ol dahi irtihân ve kabz etmişidi hâlâ mezbûr Mustafa Çelebi’ye suâl olunup meblağ-ı mezbûru edâ ve fekk-i rehine tenbîh olunmak matlûbumdur dedikde gıbbe’s-suâl mezbûr Mustafa Çelebi cevâbında kaziyye minvâl-i meşrûh üzre olduğunu ikrâr ve i‘tirâf etmeğin ikrârı mûcebince meblağ-ı mezbûr doksan guruşu müvekkil-i mezbûr için vekîl-i merkūma edâ ve teslîme ve yedinde olan mevsûfe-i mezbûreyi kabz ve teslîme merkūm Mustafa Çelebi’ye ba‘de’t-tenbîh mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Hasan Çavuş b. Hamza, mumcu Mehmed Beşe b. Abdurrahman, İbrahim Çelebi b. Ahmed, Mehmed b. İdris.