İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 407 Hüküm no: 447 Orijinal metin no: [181-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstanbul’daki tekke ve zaviyelerin meşihat cihetine mutasarrıf olan zâtın vefatından sonra yerine geçecek olanın seçimi Bâb-ı Fetvâ Dâire-i Meşîhat-i İslâmiye Tahrîrât Kalemi Aded: 21 İstanbul Kādılığı’na, Fazîletlü Efendim Hazretleri, İstanbul vilâyeti mülhakātında tekâyâ ve zevâyânın meşîhat cihetine mutasarrıf bulunan zevâtın vefâtı vukū‘unda münhal kalan mezkûr cihetin mahâllince intihâb olunan kimesnenin uhdesine tevcîhine dâir tanzîm ve isrâ kılınan i‘lâm ve mazbatada görülecek nevâkıs ve iş‘âr ve istiş‘âra bâ‘is olmamak üzere ba‘demâ cihet-i mezkûre hizmetini bi’l-asâle veyâhûd bi’l-vekâle îfâya kifâyeti bildirilen zât müteveffânın evlâdı ve gerek birâderi veyâhûd hâricden olsun Meclis-i Meşâyih şu‘besi var ise heyet-i mezkûre ve olmadığı takdîrde nâib efendinin taht-ı riyâsetinde meşâyih-i mahâlliyeden müntehab bir heyet muvâcehesinde imtihânının icrâsıyla ehliyeti tahakkuk eylediğini ve hüsn-i hâl ashâbından bulunduğunu mübeyyin varaka-i imtihâniyesiyle yedinde bulunan icâzetnâmesi ve mukayyed ve gayr-ı mukayyed vakfiye var ise sûret-i musaddakalarının i‘lâm ve mazbataya leffen tisyârı ve tâlib olduğu dergâh hangi tarîkdendir ve ol tarîkden mücâz mıdır ve şeyh-i müteveffâya dergâh pederinden müntakil ise birâderleri var mıdır, var ise ve meşîhat âhar bir kimesneye verilmişse esbâb-ı sarîhasının ve müteveffânın müte‘addid evlâdı olduğu hâlde sinleriyle adedlerinin iş‘ârı husûsunun ta‘mîmen hükkâm-ı şer‘a izbârı Meclis-i Meşâyih’den ifâde kılınmış olmağla ona göre iktizâsının îfâ ve keyfiyetin mülhakāt nüvvâbına teblîğ olunması siyâkında tezkire-i muhlisî terkīm olundu efendim. Fî 14 Zilhicce sene 1327 ve fî 14 Kânûn-ı evvel sene 1325. Şeyhülislâm Sahib