İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 408 Hüküm no: 448 Orijinal metin no: [181-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yabancıların işlerini takip maksadıyla sefaret tercümanlarınca merkez dairelere yapılan müracaatlarda işlemlerin hızlandırılması Bâb-ı Âlî Dâire-i Sadâret Tahrîrât Kalemi 180 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir, Ecânibe âid mesâlih ve mu‘âmelâtın ta‘kībi maksadıyla sefârât-ı ecnebiye tercümanları tarafından devâir-i merkeziyeye vukū‘ bulan mürâca‘atların te’mîn-i hüsn-i cereyânı zımnında merci‘-i mahsûs olmak üzere Hâriciye Nezâreti Müsteşâr Mu‘âvinliği mahâll-i ta‘kīb ittihâz edildiğinden bahisle bundan dolayı lede’l-îcâb sâlifü’z-zikr mu‘âvinlik makāmıyla nezâret müsteşârları beyninde muhâberât icrâsı ve bu usûlün vaz‘ından maksûd olan menâfi‘in istihsâli için ba‘de-ezîn umûr ve mesâlih-i mezkûrenin teshîl ve tesrî‘-i rü’yet ve cereyânı esbâbının istikmâli ile beraber doğrudan doğruya mürâca‘at edecek tercümanlara bu yolda cevâb i‘tâsı Hâriciye Nezâret-i celîlesinden bâ-tezkire inbâ ve devâir-i sâireye ta‘mîmen teblîgāt icrâ kılınmış olmağla ona göre îcâbının îfâsı bâbında emr u irâde hazret-i men-lehu’l-emrindir. Fî 22 Şevval sene 1327, fî 24 Teşrîn-i evvel sene 1325. Sadrıa‘zam Hüseyin Hilmi