İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 409 Hüküm no: 449 Orijinal metin no: [181-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yaş haddinden emekli olanlara ikramiye verilmesi Bâb-ı Âlî Dâire-i Sadâret Tahrîrât Kalemi 190 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir, Sinni altmış beşi tecâvüz edip de Tensîk Komisyonu’nun in‘ikādından evvel kendiliklerinden tekā‘üd istid‘âsında bulunarak mu‘âmelât-ı lâzımesi ikmâl edilenlere Tensîkāt Kānûnu mûcebince ikrâmiye i‘tâsı lâzım gelip gelmeyeceği hakkında istifsârı hâvî Evkāf-ı Hümâyûn Nezâret-i Aliyyesi’nden gelen tezkire Şûrâ-yı Devlet’e lede’l-havâle Tensîkāt Kānûnu’nun hükmü târih-i tasdîkinden bed’ ile Tensîk Komisyonları netîce-i mukarrerâtının i‘lânı târihine kadar cârî olacağı gibi sinni altmış beşi tecâvüz eden zevâtın gerek ihtiyarı munzam olsun gerek haklarında komisyon mukarrerâtı tatbîk edilsin her hâlde mütekā‘id ad edilmeleri muktezî bulunduğu kānûn-ı mezkûrun hükm-i sarîhi îcâbından [182] olup bu müddet zarfında sinn-i hadd-i mezkûra vâsıl olanlardan gerek ihtiyâr-ı zâtîleriyle tekā‘üd edilmiş bulunanlara, gerek Tensîk Komisyonlarının mukarrerâtı netîcesi olarak tekā‘üde da‘vet edilenlere mezkûr kānûn hükmüne tevfîkan ikrâmiye i‘tâsı lâzım geleceğinden o sûretle îfâ-yı mu‘âmele olunması Tanzîmât Dâiresi’nden bâ-mazbata ifâde ve ta‘mîmen devâire teblîğ-i madde edilmekle Dâire-i Celîle-i Meşîhat-penâhîlerince de ona göre iktizâsının îfâsı bâbında emr u irâde hazret-i men-lehu’l-emrindir. Fî 20 Şevval sene 327, fî 22 Teşrîn-i evvel sene 325. Sadrıa‘zam Hüseyin Hilmi