İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 410 Hüküm no: 451 Orijinal metin no: [182-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tensik Komisyonunca kadro dahilindeki memuriyetlere tayin edilmiş olanların kadro haricine çıkmaları durumunda müstafi sayılacakları Bâb-ı Âlî Dâire-i Sadâret 212 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Nezâret Tensîk Komisyonu’nun tensîbi ile kadro dâhilindeki me’mûriyetlere ta‘yîn kılınmış olan me’mûrîn ve ketebeden bazıları sınıflarının tenzîlinden dolayı âtiyen sınıflarına mu‘âdil bir me’mûriyete ta‘yîn kılınmak üzere kadro hâricine çıkarılarak kendilerine ma‘zûliyet maâşı tahsîsi istid‘âsında bulunduklarından ve Tensîk Komisyonları ikmâl-i vazîfe ettikten sonra vukū‘ bulacak bu misillü mürâca‘at ve müsted‘iyât hakkında yapılacak mu‘âmeleye dâir kānûn-ı mahsûsunda sarâhat olmadığından bahisle bu bâbda düstûr-ı hareket ittihâz edilmek üzere bir karâr ittihâzı lüzûmunu mutazammın Ticâret ve Nâfi‘a Nezâret-i Aliyyesi’nden bi’l-vürûd Şûrâ-yı Devlet’e havâle olunan tezkire üzerine Tanzîmât Dâiresi’nden i‘tâ olunan mazbatada me’mûrîn ve ketebenin ahvâl-i sâbıkā ve lâhıkalarını ve derece-i iktidârlarını tedkīk ederek kadro dâhilindeki me’mûriyetde yerleştirmek Tensîk Komisyonlarının vezâifi cümlesinden olup bu sûretle tefrîk edilerek me’mûriyetlere ta‘yîn olunan me’mûrîn ile ketebenin komisyonların münâsib gördükleri derece dâhilinde ad olunmaları lâzım geleceği cihetle derecât-ı mezkûreyi kabûl etmek istemeyenlerin tensîkātdan evvelki sınıflarına mu‘âdil bir me’mûriyete ta‘yînlerine intizâren kadro hâricinde kalmakla hakları olamayacağından bu makūle kadro hâricine çıkmağı arzu eden me’mûrîn ile ketebeye müsta‘fî nazarıyla bakılması lâzım geleceğinin nezâret-i müşârün-ileyhâya ve ta‘mîmen devâir-i merkeziyeye teblîği tezekkür kılındığı inbâ ve mûcebince îcâbı icrâ kılınmış olmağla dâire-i celîle-i ilmiyece de ona göre icrâ-yı îcâbına himmet buyurulması bâbında emr u irâde hazret-i men-lehu’l-emrindir. Fî 22 Zilka‘de sene 1327 ve fî 22 Teşrîn-i sânî sene 1325. Sadrıa‘zam Hüseyin Hilmi