İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 412 Hüküm no: 454 Orijinal metin no: [183-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tevatüren şahidlerin dinlenmesi gereken davalarda davanın ne olduğu, kimlerin getirilerek dinleneceği Bâb-ı Fetvâ Dâire-i Meşîhat-i İslâmiye Tahrîrât Kalemi Aded: - Tevâtüren şuhûd istimâ‘ı muktezî bir da‘vâ vukū‘unda şuhûdün istimâ‘ından mukaddem da‘vâ neden ibâret olduğunun ve isim ve şöhretleriyle kimlerin ikāme ve istimâ‘ olunacağının arzıyla makām-ı mecîden istîzân-ı keyfiyet olunması fî 10 Safer sene 1309 târihinde ta‘mîmen hükkâm-ı şer‘a teblîğ edilmiş ise de bu suretin dâ‘î-i müşkilât olmakta bulunduğu ahîren anlaşıldığından bahisle beyyine-i tevâtürün bilâ-istîzân ber-nehc-i şer‘î istimâ‘ı hakkında irâde-i seniyye-i hazret-i hilâfet-penâhîmin istihsâli mûceb-i muhassenât olacağı Fetvâhâne ve Meclis-i Tedkīkāt-ı Şer‘iyye’den ifâde olunarak keyfiyet lede’l-arz beyyine-i tevâtürün bilâ-istîzân ber-nehc-i şer‘î istimâ‘ı husûsuna fî 7 Zilhicce sene 1327 târihinde irâde-i seniyye-i cenâb-ı pâdişâhî şeref-sudûr buyurulmuş ve ol vechile îfâ-yı mu‘âmele olunması ta‘mîmen hükkâm-ı şer‘a iş‘âr ve mülhakāta gönderilmek üzere işbu tahrîrâtın nüsah-ı kâfiyesi leffen irsâl kılınmış olmağla îfâ-yı muktezâsı siyâkında şukka-i mecî terkīm olundu. Fî Zilhicce sene 1327 ve fî Kânûn-ı evvel sene 325.