Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 568 Hüküm no: 695 Orijinal metin no: [121b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Mustafa’nın Ahmed b. Abdurrahman’dan muhâlaa yoluyla boşandığı Mahmiye-i İstanbul’da Çerağī Hamza mahallesi sâkinelerinden olup zâtı ma‘rifet-i şer‘iyye ile ârifân Abdurrahman b. Hasan ve Hüseyin b. Mustafa nâm kimesneler ta‘rîfleriyle mu‘arrefe olan Ayşe bt. Mustafa nâm hâtun meclis-i şer‘-i şerîfde zevc-i dâhili bâ‘isü’l-kitâb Ahmed b. Abdurrahman nâm kimesne mahzarında ikrâr ve takrîr-i kelâm edip zevcim mezbûr Ahmed zimmetinde mütekarrir ve ma‘kūdun-aleyh olan bin beş yüz akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr ile muhâla‘a-i sahîha-i şer‘iyye ile muhâla‘a edip ol dahi ber vech-i muharrer hul‘-ı mezbûru kabûl ettiğinden sonra hukūk-ı zevciyyete müte‘allika âmme-i da‘vâdan her birimiz âharın zimmetini ibrâ-i âmm-ı kātı‘ü’n-nizâ‘la ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Ali Çelebi b. Bâli, Şaban b. Yusuf, Mehmed Çelebi b. İdris, Ebûbekir b. Mustafa, Hüseyin Beşe b. Mustafa.