İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 418 Hüküm no: 462 Orijinal metin no: [186-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yeni kaza teşkili ve bazı kazaların livaya dönüştürülmesi işlemlerinin, gerekli masrafların karşılığı bulunmadan yapılmaması Sadâret’den 196 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Yeniden kazâ teşkîli ve bazı kazâların livâya tahvîli gibi büdcede karşılığı olmayan ve mesârif-i zâideyi istilzâm edecek olan husûsâtın senesi içinde mevki‘i-i tatbîka vaz‘ı mümkün olamayacağı misillü gelecek sene büdcesinin bu yoldaki mukarrerâtdan dolayı tebdîl ve tağyîri dahi gayr-ı câiz bulunmasına ve teşkîlât ve taksîmât-ı mülkiyede vukū‘a getirilecek tebeddülâtın te’sîri yalnız bir nezârete munhasır olmayıp devâir-i müte‘allika-i sâire de bundan hissedâr olduğuna binâen teşkîlât-ı cedîdeye lüzûm görüldüğü takdîrde bunun hangi nezâretlerin büdcelerinde ne gibi mesârifi istilzâm edeceği tamamen tebeyyün ve Hazînece tasdîk edilmedikçe bu bâbda bir karâr ittihâz olunmaması ve şimdiye kadar irâde-i seniyye-i mülûkâneye iktirân eden ve arz u istîzân olunacak henüz irâde-i seniyyesi şeref-sudûr etmeyen teşkîlâtdan dolayı üç yüz yirmi altı senesi büdcelerine ne mikdâr tahsîsât ilâvesi îcâb edeceği büdce encümeninde nazar-ı tedkīke alınmak üzere devâir-i müte‘allikaca Meclis-i Meb‘ûsân’a iş‘âr-ı keyfiyet olunmağla beraber mezkûr büdcenin tasdîkine kadar teşkîlâtın te’hîr-i icrâsı Mâliye Nezâret-i Aliyyesi’nin iş‘ârı üzerine bi’t-tensîb îcâb eden devâire teblîgāt îfâ kılınmış olmağla Bâb-ı Vâlâ-yı Meşîhat-penâhîlerince de ona göre iktizâsının icrâsı bâbında. Fî 4 Zilka‘de sene 1327, fî 8 Teşrîn-i sânî sene 325. Sadrıa‘zam Hüseyin Hilmi