İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 419 Hüküm no: 463 Orijinal metin no: [187-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tarih-i Osmânî yazılması için Vakanüvis Abdurrahman Efendi başkanlığında Tarih-i Osmânî Encümeni adıyla bir komisyon kurulması Sadâret’den 207 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Masârıf-ı tab‘iyesi ceyb-i hümâyûn-ı mülûkâneden tesviye olunmak üzere mükemmel bir Târih-i Osmânî vücûda getirilmesi zımnında ber-mantûk-ı emr u fermân-ı hümâyûn a‘yândan Vak‘anüvis Abdurrahman Efendi hazretlerinin taht-ı riyâsetinde teşkîl olunan komisyonun Târih-i Osmânî Encümeni nâmıyla resmen tanınması ve bu bâbda kaleme alınan ta‘lîmât lâyihasının mevki‘-i tatbîka vaz‘ı husûsuna müşârün-ileyh tarafından vukū‘ bulan iş‘âr üzerine Meclis-i Mahsûs-ı Vükelâ karârıyla bi’l-istîzân irâde-i seniyye-i cenâb-ı hilâfet-penâhî şeref-müte‘allik buyurulması ve mezkûr encümen a‘zâ-yı dâimesinden hizmet-i devletde bulunanlara encümenin eyyâm-ı in‘ikādiyesinde hazır bulunmak üzere mensûb oldukları dâirelerce müsâ‘ade ve bunların mümkün mertebe İstanbul’da istihdâm olunmalarının nazar-ı dikkate ahz olunması ve a‘zâ-yı dâimeden başka devâir-i hükûmetde müstahdem olan a‘zâ-yı mu‘âvenenin ve sâir bazı erbâb-ı ihtisâsın dahi lede’l-hâce encümene da‘vetlerinde ruhsat verilmesi ve encümen a‘zâsının lede’t-teblîğ devâirin evrâk mahzenlerine mürâca‘ata me’zûn olmaları zikrolunan ta‘lîmâtın cümle-i münderecâtından olarak müşârün-ileyhe ve bi’l-umûm devâire teblîgāt icrâ kılınmış olmağla Dâire-i Celîle-i İlmiyece de ona göre iktizâsının îfâsı bâbında emr u irâde hazret-i men-lehu’l-emrindir. Fî 19 Zilka‘de sene 1327 ve fî 19 Teşrîn-i sânî sene 1325. Sadrıa‘zam Hüseyin Hilmi