İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 420 Hüküm no: 464 Orijinal metin no: [187-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Devlete ait satılacak menkul ve gayr-ı menkul mallar ile demirbaş eşyanın işlemlerinin Maliye memurları tarafından yapılması Mâliye Nezâreti’nden 397 Ma‘rûz-ı bende-i dîrîneleridir ki, Muvâzene-i Umûmiye Kānûnu’nun altıncı maddesinin fıkra-i ahîresinde mîrîye âid olup satılacak kâffe-i emvâl-i menkūle ve gayr-ı menkūle ve demirbaş eşyâ bedelâtı da munhasıran? me’mûrîn-i Mâliye ma‘rifetiyle kabz ve istifâ edileceği muharrer olduğu hâlde bazı devâirde kānûnun bu hükmüne tamamıyla ri‘âyet edilmediği işitilmekde ve on üçüncü maddesinde bin liradan yukarı olup da def‘aten sarf olunacak mikdârı büdcede musarrah ve mesârif-i mukanneneden ma‘dûd olmayan mesârif-i gayr-ı mukannene hakkında ittihâz-ı karâr olunmadan evvel Mâliye Nezâreti’ne iş‘âr ve muvâzenedeki tahsîsât-ı mürettebenin sene nihâyetine kadar tecâvüz ettirilmeyeceği te’mîn edilip Mâliye Nezâretince de bi’t-tedkīk tasdîk olunmadıkça sarfiyât icrâ olunamaz denildiği hâlde dâirelerinden bazılarında işe karâr verildikten sonra Hazîne’ye iş‘âr vukū‘u görülmektedir. Ma‘lûmdur ki, altıncı madde-i kānûniyeye o fıkranın vaz‘ından maksad devr-i sâbıkın mirası olan âdât ve mu‘âmelât-ı seyyi’eye karşı birer kānûn-ı mahsûs ile ta‘yîn-i harekât edilinceye değin elde bulunan hükûmet mâllarıyla ondan ziyâde sû-i isti‘mâle uğrayan demirbaş eşyânın nizâmında ve yolunda satılıp hukūk-ı hazîneyi izâ‘aya meydân vermemek on üçüncü maddenin dercindeki hükmünde haddi ve zamân-ı sarfı mu‘ayyen ve mukannen olmayan mesârifin bin liradan ziyâdesi te’diye ve tahkīk i‘tibârıyla bir emr-i mühim ad edilip zamân-ı te’diyede Mâliye Nezâretince gözetilmesi lâzım gelen imkânı ve o nev‘ mesârif-i gayr-ı mukannenenin birden bire tekerrür-i zuhûruyla tahsîsâtın sene nihâyetine kadar kifâyet etmemesi gibi ihtimâlâtı gözeterek hükm-i kānûnu halelden vikāye etmek ve ettirmek olduğuna mebnî bu iki nokta-i mühimme-i mâliye hakkında bi’l-hâssa nazar-ı dikkatinizi celb etmeğe lüzûm gördüm, ol bâbda emr u fermân hazret-i veliyyü’l-emrindir. Fî 15 Şa‘bân sene 1327 ve fî 18 Ağustos sene 1325. Mâliye Nâzırı Nâmına Müsteşâr Baha