İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 426 Hüküm no: 473 Orijinal metin no: [190-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şer‘iye mahkemelerine çağrılmalarına rağmen gelmeyen ve vekil göndermeyenler hakkında yapılacak uygulama İstanbul Kādılığı’na, Fazîletlü Efendim Hazretleri, Müdde‘îlerin taleb ve istid‘âları üzerine mehâkim-i şer‘iyeye gelmekten ve vekîl göndermekten imtinâ‘ eden müdde‘â-aleyhime eyyâm-ı muhtelife-i mu‘ayenede üç def‘a varaka-i da‘vetiye irsâliyle da‘vet ve gelmedikleri ve vekîl göndermedikleri takdîrde mezkûr da‘vetiye varakalarında dahi muharrer olduğu üzere vekîl nasbıyla müdde‘înin da‘vâsı ve beyyinesi istimâ‘ olunacağını mübeyyin bir de muhtıra irsâlinden sonra icâbet etmeyenlere kıbel-i şer‘den hukūklarını muhâfaza edecek bir kimesneyi vekîl ta‘yîn ederek gıyâben muhâkemeye ibtidâr ve müdde‘înin da‘vâsı ve beyyinesi istimâ‘ ve tedkīk edilerek mukārin-i sıhhat olduğu [191] sâbit oldukta hükümleri tevkī‘ edilmekde ise de bu sûret ashâb-ı mesâlihin tûl müddet mehâkim-i mezkûreye gidip gelmelerinden dolayı hukūklarının istihsâlini te’hîre bâdî olmasına ve bunlara nazar şer‘-i âlîde müstahsen görülememesine binâen ba‘demâ muhtıradan sarf-ı nazarla mehâkim-i mezkûreye gelmekten ve vekîl göndermekten imtinâ‘ eden müdde‘â-aleyhime üç def‘a varaka-i da‘vetiye gönderilip ancak varaka-i sâliseye müdde‘â-aleyhimin mahkeme yerine gelmediği takdîrce bir vekîl nasb olunarak müdde‘înin da‘vâ ve beyyinesinin istimâ‘ kılınacağının ilâve olunması lâzım geleceği Encümen-i Islâhat-ı İlmiye’den verilen müzekkire üzerine fetvâhâneden ifâde kılınmış ve mûcebince mu‘âmele îfâsı lüzûmu bi’l-cümle hükkâm-ı şer‘e teblîğ edilmiş olmağla ba‘demâ ol vechile îfâ-yı mu‘âmele olunması siyâkında tezkire-i muhlisî tahrîr olundu. Fî 2 Safer sene 1328 ve fî 31 Kânûn-ı sânî sene 1325. Şeyhülislâm Hüseyin Hüsnü