İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 426 Hüküm no: 474 Orijinal metin no: [191-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tensik Kanunu’nun tasdik tarihi olan 17 Haziran 1325’ten itibaren geçerli olduğu Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, Fî 22 Teşrîn-i evvel sene 1325 târihli tezkireye zeyldir. Tensîk Kānûnu’nun hükmü târih-i tasdîkinden bed’ ile tensîk komisyonları netîce-i mukarrerâtının i‘lânı târihine kadar cârî olacağı Şûrâ-yı Devlet karârı iktizâsından ise de mezkûr kānûnun tasdîk-i âlîye iktirânı târihi 17 Haziran sene 1325 olduğu hâlde nezâret muhâsebesinde mevcûd kānûnunda târih-i neşri 25 Haziran sene 1325 olarak muharrer olduğu ve Matbû‘ât-ı Dâhiliye İdâresi’nden verilen müzekkirede dahi kānûn-ı mezkûrun 27 Haziran sene 1325 târihinden i‘tibâren Takvîm-i Vakāyi‘ ile i‘lânına başlanıldığı ifâde kılınmış olduğu beyânıyla tevârih-i mezkûrenin hangisi mu‘teber olacağına dâir istifsârı hâvî Dâhiliye Nezâret-i Aliyyesi’nden vârid olan tezkire-i cevâbîye Şûrâ-yı Devlet’e lede’l-havâle Tanzîmât Dâiresi’nden i‘tâ olunan mazbatada Tensîk Kānûnu’nun tasdîkiyle beraber sinni altmış beşi tecâvüz eden me’mûrların her hâlde mütekā‘id ad edilmeleri muktezî bulunduğu kānûnun hükm-i sarîhi îcâbından olmasına ve ekser devâirce me’mûrların mezkûr kānûndan istifâde edecekleri mülâhazasıyla târih-i tasdîkinden i‘tibâren rızâlarına bakılmaksızın tekā‘üde sevk edilmiş olmaları dahi bu fikre müstenid bulunmasına nazaran mezkûr kānûnun târih-i tasdîki olan fî 17 Haziran sene 1325 târihinden mu‘teber olması lâzım geleceği inbâ ve mûcebince devâir-i sâireye de teblîgāt icrâ olmağla Dâire-i Celîle-i İlmiyece de ona göre îfâ-yı muktezâsı bâbında emr u irâde hazret-i men-lehu’l-emrindir. Fî 19 Zilhicce sene 1327, fî 19 Kânûn-ı evvel sene 1325. Sadrıa‘zam Hüseyin Hilmi