İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 435 Hüküm no: 484 Orijinal metin no: [197-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Temyiz ve tedkiki istenilen ilam ve hüccetlerden fetvahanece alınan harcların varidat hazinesine dahil edilmesiyle hazine adına alınması Meşîhat 7 İstanbul Kādılığı’na, Fazîletlü Efendim Hazretleri, Temyîz ve tedkīki taleb edilen i‘lâmât ve hücec-i şer‘iye için fetvâhânece öteden beri istifâ edilmekde olan harclar vâridât büdcesine dâhil olmasına mebnî hazîne-i celîle nâmına cibâyet olunması muktezî olduğundan mezkûr harcların mahallerince îrâd ve kaydolunarak mehâkim-i şer‘iyeye mahsûs ilmühaberdir ibâreli pullardan vesâik-i şer‘iye zahrlarına ilsâk olunduktan sonra irsâli muhâsebe ifâdesine binâen gurre-i Ramazan sene 1327 târihinde ta‘mîmen hükkâm-ı şer‘e teblîğ olunduğu hâlde el-yevm harcı tatbîka mukābil ekser mahallerden damga ve posta pulları gönderilmekte ve bunlardan bazıları da ziyâ‘a uğramakta ve bu sûret hem hukūk-ı hazîneyi ve hem de ashâbını mutazarrır ve mu‘âmelâtı da işkâl eylemekde olduğundan iş‘âr-ı sâbık vechile îfâ-yı mu‘âmele olunması lüzûmunun te’kîden ve zarfların kâğıdları âdî olması hasebiyle postada fersûdeleşip açılmakta ve ba‘zen de zâyi‘ât vukū‘ bulmakta olduğundan zarfların da sağlam olmasına i‘tinâ edilmesinin ilâveten iş‘ârına dâir Evrâk Müdîriyeti’nden verilen müzekkire üzerine ta‘mîmen teblîgāt icrâsı Encümen-i Islâhât-ı İlmiye’den ifâde olunmuş ve mülhakāt nüvvâbına gönderilmek üzere işbu tahrîrâtın nüsah-ı kâfiyesi leffen tisyâr kılınmış olmağla ol vechile îfâ-yı muktezâsı siyâkında tezkire-i mecî terkīm kılındı. Fî-selhi Rebî‘ülevvel sene 1328 ve fî 28 Mart sene 1326. Şeyhülislâm Hüseyin Hüsnü