İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 436 Hüküm no: 485 Orijinal metin no: [197-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mütevellisi bulunmayan mülhak vakıfların musakkafat ve müstegallatı ferağ ve intikal muamelelerinin hakim görüşü ile evkaf memurlarının huzurunda yapılması Meşîhat 3 İstanbul Kādılığı’na, Fazîletlü Efendim Hazretleri, Mütevellîleri bulunmayan evkāf-ı mülhakanın icâreteynli musakkafât ve müstegallâtının mu‘âmele-i ferâğiyeleri re’y-i hâkim ile mütevellî sıfâtı verilen Defter-i hâkānî me’mûrları huzûrunda icrâ ettirilmekte ise de bu sûrete mesâğ-ı şer‘î olmadığı cihetle ba‘demâ bu misillü vakıflar ferâğ ve intikāl mu‘âmelâtının hîn-i vukū‘unda hükkâm-ı şer‘ taraflarından bi’l-umûm evkāf me’mûr ve vekîllerinin mütevellî kāimmakāmı nasb u ta‘yîni ile bu kere neşrolunan nizâmnâme mûcebince onlar huzûrunda icrâsı lüzûmu Evkāf-ı Hümâyûn Nezâret-i celîlesinden iş‘âr edilmiş olduğundan bahisle istîzân-ı mu‘âmeleyi hâvî Defter-i Hâkānî Nezâret-i Aliyyesi’nden vürûd eden tezkire üzerine bi’l-muhâbere Evkāf-ı Hümâyûn Nezâreti’nden cevâben vârid olan tezkirede mütevellîsi fevt olup da tevliyeti henüz tevcîh olunmayan veyâhûd mütevellîsi mechûl veyâ diyâr-ı ba‘îdede bulunan evkāfa âid musakkafât ve müstegallâtın ferâğ ve intikālinde hazır bulunmak üzere muvakkaten ecânibden mütevellî kāimmakāmı nasb u ta‘yîn olunduğu takdîrde icâre-i müeccele ve bedel-i huker ve mukāta‘ası îfâ olunamamasından nâşî îcârının feshiyle vakfına ircâ‘ı veyâ muvâza‘a ve meccânen ferâğ sebebiyle yâhûd suver-i uhrâ ile mahlûliyeti lâzım gelen birçok akārât-ı vakfiyenin adem-i ıtlâ‘ı hasebiyle takrîri ahz ve senedâtı i‘tâ edilip hukūk-ı vakfın ziyâ‘ına ve senedât-ı hâkāniye ile tasarruf olunan akārda de‘âvî hudûsuna sebeb verilerek birçok ahvâlde i‘tibârlarını ihlâle bâdî ve her hâlde me’mûrîn-i vakfiyenin ahvâl-i mezkûreye vukūfu cihetiyle onlar ma‘rifetiyle cereyân-ı mu‘âmele müşkilât-ı vâkı‘anın hudûsunu mâni‘ ve hukūk-ı vakfın siyânetiyle tasarrufun halelden masûniyetini müeddî bulunduğu dermeyân kılındığından ve fi’l-hakīka mu‘âmelât-ı [198] mezkûre me’mûrîn-i vakfiyenin ma‘lûmâtı tahtında cereyân ettikçe müşkilât-ı melhûza ber-taraf olacağı gibi el-hâletü hâzihî kâffe-i vilâyât ve mülhakātda evkāf me’mûrları mevcûd bulunmasına göre Defter-i Hâkānî Nezâretince dermeyân edilen teahhur mahzûru da gayr-ı vârid ve ahvâl-i sâbıkāın yirmi yedi seneden beri cereyân etmiş olması selâmet-i maslahata hâdim olacak suver-i cedîde-i inzibâtiyenin kabûl ve ittihâzını mâni‘ olamayacağı tabî‘i görülerek Evkāf Nezâreti’nin iş‘ârı dâiresinde mu‘âmele icrâsı tensîb edilmiş olduğundan ba‘demâ mütevellîleri bulunmayan evkāf-ı mülhakanın icâreteynli musakkafât ve müstegallâtının ferâğ ve intikāl mu‘âmelâtının hükkâm-ı şer‘ tarafından bi’l-umûm evkāf me’mûr ve vekîllerinin ber-vech-i muharrer mütevellî kāimmakāmı nasb u ta‘yîniyle onlar huzûrunda icrâsı hakkında Şûrâ-yı Devlet Mülkiye Dâiresi’nden i‘tâ olunan mazbata sûretinin leffiyle vârid olan tezkire-i sâmîye üzerine keyfiyet Encümen-i Islâhât-ı İlmiye ifâdesiyle ta‘mîmen hükkâm-ı şer‘e iş‘âr ve mülhakāt nüvvâbına gönderilmek üzere işbu tahrîrâtın nüsah-ı kâfiyesi leffen isrâ kılınmış olmağla ona göre iktizâsının îfâ ve nizâm-ı mevzû‘u vechile tasarruf senedâtı Defter-i hâkānî me’mûrları ve tapu kâtibleri taraflarından verileceğinden mu‘âmelât-ı mezkûrenin icrâsında onlarında hazır bulundurulması siyâkında tezkire-i mecî terkīm kılındı. Fî 28 Rebî‘ülevvel sene 1328 ve fî 27 Mart sene 1326. Şeyhülislâm Hüseyin Hüsnü