Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 569 Hüküm no: 697 Orijinal metin no: [122a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri 91. Cemaat bir kısım odalıların Azak Kalesi’ndeki ortak menzillerinin satış bedellerinin tahsili Dergâh-ı âlî yeniçerilerinin doksan bir cemâ‘atine mahsûs oda ahâlîsinden odabaşı Musli Beşe b. Mustafa ve imâm Hüseyin Efendi ve nâzır el-Hâc Osman b. Sinan ve Ömer Beşe b. Mehmed ve Halil Beşe [b.] İbrahim ve başkorucu Dayıoğlu Mustafa Beşe nâm kimesneler meclis-i şer‘-i şerîf-i enverde mahmiye-i İstanbul’da Çelebioğlu mahallesinde sâkin el-Hâc Ahmed b. Bayram tarafından ikrâr-ı âti’l-beyânı tasdîke vekîl-i şer‘îsi olan el-Hâc ( ) b. Abdullah mahzarında her biri ikrâr ve takrîr-i kelâm edip hâlâ Azak muhâfazasında olan el-Hâc İvaz Beşe b. Abdullah bundan akdem tarafımızdan vekâleten Azak’da vâki‘ kışla ta‘bîr olunur beynimizde ma‘lûm menzilimizi âhara beş yüz on guruşa bey‘ ve kabz-ı semen ettiğinden sonra semen-i mezbûru poliçe tarîkiyle merkūm el-Hâc Ahmed üzerine bizi mektûbuyla havâle ve her birimiz kabûl etmişidi hâlâ müvekkil-i mezbûr el-Hâc Ahmed ber vech-i muharrer havâle olunan meblağ-ı mezbûrun dört yüz guruşunu bize edâ ve teslîm ben dahi yedinden ahz u kabz eyledik dediklerinde gıbbe’t-tasdîki’l-vicâhî mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim Çelebi b. Ahmed, Mehmed Çelebi b. İdris. Hüseyin b. Mustafa, Hüseyin b. Mehmed ve gayruhüm mine’l-huzzâr.