Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 570 Hüküm no: 698 Orijinal metin no: [122a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayram b. Mehmed’den aldığı ödüncü ödemesi için Mehmed Beşe b. Hasan’a tembih Mahmiye-i İstanbul’da Sinan Paşa mahallesinde sâkin bâ‘isü hâze’l-kitâb Bayram Efendi b. Mehmed meclis-i şer‘-i şerîf-i enverde mahalle-i mezbûre sükkânından Mehmed Beşe b. Hasan mahzarında üzerine da‘vâ ve takrîr-i kelâm edip mezbûr Mehmed Beşe zimmetinde cihet-i karz-ı şer‘îden bin sekiz yüz yetmiş dört akçe hakkım olup meblağ-ı mezbûrun altı yüz otuz akçesini yedinden ahz u kabz ve istîfâ edip bin iki yüz kırk dört akçe zimmetinde bâkī kalmağla suâl olunup meblağ-ı bâkī-i mezbûru dahi bana edâya tenbîh olunmak matlûbumdur dedikde gıbbe’s-suâl mezbûr Mehmed Beşe cevâbında fi’l-hakīka müdde‘î-i mezbûr Bayram Efendi’ye ber vech-i muharrer cihet-i mezbûreden bâkī bin iki yüz kırk dört akçe zimmetinde deyni olduğunu bi tav‘ihî ikrâr etmeğin alâ mûcebi i‘tirâfihî meblağ-ı bâkī-i mezbûru müdde‘î-i mezbûra edâ ve teslîme mezbûr Mehmed Beşe’ye tenbîh olunup mâ vaka‘a bi’t-taleb ketb olundu. Fi’l-yevmi’t-tâsi‘ ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İbrahim b. Mehmed, Hüseyin b. Mustafa, Hasan b. Mehmed, Mahmud b. Mehmed, Nasuh b. Ömer.