Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 570 Hüküm no: 699 Orijinal metin no: [122a-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halep Süryani Patriği Salamon v. David’in Ali b. Yusuf’tan ödünç alması Medîne-i Haleb’de vâki‘ Süryanî tâifesinin patriği olan Abdülmesih nâm râhibin vekîli olup hâlâ medîne-i Ebâ Eyyûb el-Ensârî’de Çömlekçi mahallesinde müsâfiren sâkin Salamon v. David nâm zimmî meclis-i şer‘-i şerîf-i enverde mahmiye-i İstanbul’da Molla Gürânî mahallesinde sâkin bâ‘isü hâze’l-kitâb Ali b. Yusuf tarafından ikrâr-ı câ’i’l-beyânı tasdîke vekîl-i sâbitü’l-vekâle olan Ahmed Beşe b. Mustafa mahzarında ikrâr-ı tâm ve takrîr-i kelâm edip [122b] müvekkil-i merkūm Ali Efendi bin üç yüz elli guruşunu bana ikrâz ve teslîm ben dahi yedinden iktirâz ve kabz etmekle hâlâ meblağ-ı mezbûr bin üç yüz elli guruş cihet-i karz-ı şer‘îden merkūm Ali Efendi’ye vâcibü’l-edâ ve lâzımü’l-kazâ zimmetimde deynimdir, târih-i kitâbdan doksan bir gün tamâmına değin meblağ-ı mezbûr bin üç yüz elli guruşu medîne-i Haleb’de merkūm Ali Efendi’nin tarafından kabza vekîli olan kimesneye edâya ve teslîme ta‘ahhüd ve iltizâm eyledim dedikde gıbbe’t-tasdîki’l-vicâhî ve’t-tahkīki’ş-şifâhî mâ vaka‘a bi’t-taleb ketb olundu. Fî gāyet-i şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İsmail b. ( ) Sarrâcbaşı, Ali Odabaşı, el-Hâc Abdülkerim [b.] el-Hâc Mehmed, el-Hâc Mahmud b. Hüsam.