İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 449 Hüküm no: 504 Orijinal metin no: [204-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hava değişikliği ve izin alan memurların maaşlarının tam olarak ödenmesi Dâire-i Sadâret’den 66 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, 12 Kânûn-ı sânî sene 325 târihli tezkireye zeyldir. Vezâif-i müştereke ashâbından olup da gerek tebdîl-i hava gerek mesâlih-i zâtiyesinin tesviyesi zımnında istihsâl-i me’zûniyet eden me’mûrîne esnâ-yı me’zûniyetlerinde maâşlarının tâm olarak i‘tâsı lâzım geleceğine dâir Şûrâ-yı Devlet Mâliye ve Nâfi‘a ve Ma‘ârif Dâiresi’nden i‘tâ olunan mazbatanın sûreti matviyyen savb-ı âlî-i fetvâ-penâhîlerine isrâ ve ta‘mîmen devâire teblîgāt icrâ kılınmağla Dâire-i Celîle-i İlmiyece de mûcebince iktizâsının îfâsı bâbında emr u irâde hazret-i men-lehu’l-emrindir. Fî 13 Rebî‘ülâhir sene 328 ve fî 11 Nisan sene 326. Sadrıa‘zam Hakkı Dâire-i Sadâret’den sûret Tebdîl-i hava zımnında me’zûn olan me’mûrîne tâm maâş i‘tâsı Harcırâh Karârnâmesi’nin on üçüncü maddesi iktizâsından ise de madde-i mezbûre nısf maâş i‘tâsı sûretinde ve usûlü dâiresinde mukaddemâ ta‘dîl edilmiş olmasına mebnî tebdîl-i havaya ihtiyâcı tahakkuk edip de me’zûniyet verilen me’mûrîn hakkında [205] madde-i mu‘addele mûcebince îfâ-yı mu‘âmele olunması lüzûmuna dâir tanzîm ve takdîm kılınan 7 Muharrem sene 328 târihli mazbata mûcebince sebk eden teblîğe cevâben Orman ve Ma‘âdin ve Zirâ‘at Nezâreti’nin Şûrâ-yı Devlet’e havâle buyrulan 28 Safer sene 328 târihli tezkiresi Mâliye ve Ma‘ârif ve Nâfi‘a Dâiresi’nde kırâet olundu. Gerek madde-i esâsîye ve gerek madde-i mu‘addelenin hükmü me’mûrîne ma‘tûf ve vezâif-i müştereke ashâbından olan mecâlis a‘zâsıyla zâbitân aklâm ve ketebe metn-i kānûnda gayr-ı mezkûr olup zâten madde-i mezkûrenin ta‘dîlindeki maksad bu misillü me’zûn olanların vazîfelerini îfâ için yerlerinde istihdâm olunacak vekîllere verilecek paraya karşılık tedârikinden ibâret bulunmasına göre gerek tebdîl-i hava ve gerek mesâlih-i zâtiyesinin tesviyesi için me’zûniyet aldığı hâlde vazîfesini rüfekâsı tarafından îfâ edilecek ve yerinde vekîl istihdâmına ve binâen-aleyh vekâlet maâşı i‘tâsına lüzûm görülecek olan vezâif-i müştereke ashâbının esnâ-yı me’zûniyetlerinde maâşlarının tâm olarak i‘tâsı lüzûmunu ifhâm etmekte bulunduğunu beyânıyla bu bâbda olunacak mu‘âmele istifsâr kılınmıştır. Taht-ı muhâkemeye alınıp berâeti tahakkuk eden ve me’zûniyet alan me’mûrîn maâşlarından nısfının tevkīfi yerlerine ta‘yîn olunacak vekîllere verilecek maâşâta karşılık bulunmak maksadına mebnî olup vezâif-i müştereke ashâbından olan me’mûrîne vekîl ta‘yînine hâcet olmadığı cihetle bu misillüler maâşâtının tâm olarak tesviyesi mukaddemâ tefsîren Şûrâ-yı Devletce ittihâz olunup ahîren dahi bi’t-te’yîd ta‘mîmen teblîğ buyrulan mukarrerât ahkâmından ve mukarrerât-ı mezkûrenin sâlifü’z-zikr on üçüncü maddenin târih-i ta‘dîlinden mu’ahhar olmasına mebnî karâr-ı âharla fesh ve nakz edilmedikçe mer‘iyyet muktezâ-yı hâlden bulunmuş olmağla ona göre îfâ-yı mu‘âmele olunması lâzım geleceğinin ta‘mîmen devâir-i merkeziyeye iş‘ârı tezekkür kılındı, ol bâbda. Fî 9 Rebî‘ülâhir sene 328 ve fî 6 Nisan sene 326.