İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 450 Hüküm no: 505 Orijinal metin no: [205-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hava değişikliği alan memurlara yarım maaş verilmesi Sadâret’den 242 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir, Fî 12 Ağustos sene 325 târihli tezkireye zeyldir. Tebdîl-i hava zımnında me’zûniyet istihsâl eden me’mûrîne Maâşât ve Harcırâh Karârnâmesi’nin on üçüncü madde-i mu‘addelesi mûcebince nısf maâş i‘tâsı zarûri bulunduğuna dâir Şûrâ-yı Devlet Mâliye ve Nâfi‘a ve Ma‘ârif Dâiresi’nden i‘tâ kılınan mazbatanın sûreti leffen isrâ ve ta‘mîmen devâire teblîgāt icrâ kılınmağla Bâb-ı Vâlâ-yı Meşîhat-penâhîlerince de mûcebince iktizâsının îfâsına himmet buyurulması bâbında emr u irâde hazret-i men-lehu’l-emrindir. Fî 13 Muharrem sene 328 ve fî 12 Kânûn-ı sânî sene 326. Sadrıa‘zam Hakkı Sadâret’den Şûrâ-yı Devlet Mâliye Nâfi‘a ve Ma‘ârif Dâiresi’nin 4136 numaralı mazbatasının sûretidir. Defter-i Hâkānî Nezâreti’nin Şûrâ-yı Devlet’e havâle buyrulan fî 21 Ramazan sene 327 târihli ve iki yüz yirmi numaralı tezkiresi Mâliye ve Nâfi‘a ve Ma‘ârif Dâiresi’nde kırâet olundu. Meâlinde, tebdîl-i hava zımnında me’zûniyet istihsâl edenlere irâde-i seniyyeye iktirân eden Maâşât ve Harcırâh Karârnâmesi’nin on üçüncü maddesi mûcebince tâm maâş i‘tâsı lâzım gelip irâdeye iktirân etmeyen mukarrerât-ı sâlifenin hâl-i hâzırda mer‘iyyeti câiz olamayacağı Şûrâ-yı Devlet Heyet-i Umûmiyesi karârını mübelliğ şeref-tastîr buyrulan fî 12 Ağustos sene 325 târihli ve üç yüz kırk dört numaralı tezkire-i sâmîyenin bir fıkrasında emr u iş‘âr buyurulmuş ise de fî 17 Temmuz sene 307 târihli tezkire-i sâmîye ile teblîğ kılınmış olan madde-i mezkûrenin sûret-i mu‘addelesinde ber-vech-i ma‘rûz tebdîl-i hava için me’zûniyet istihsâl edenlere nısf maâş [206] i‘tâ kılınacağı musarrah olduğuna ve re’sen me’mûrînden olup da vazîfesinin vekîl ma‘rifetiyle rü’yeti lâ-büd olanların hastalıkları esnâsında istihsâl edecekleri müddet-i me’zûniyetleri maâşlarının da bâbdaki iş‘âr-ı sâmî mûcebince tâm olarak tesviyesi hâlinde vekîllerine i‘tâsı lâzım gelen maâşâtın bi’t-tab‘ mahâll-i îfâsı bulunamayacağına nazaran istîzân-ı mu‘âmele kılınmıştır. Sâlifü’z-zikr 12 Ağustos sene 325 târihli tezkire-i sâmîye dosyası celb ve tedkīk olundukta tebdîl-i hava zımnında me’zûniyet istihsâl edenler ile ba‘de’l-muhâkeme berâet [eden] me’mûrlar vekîllerine verilecek humus maâşdan mütebâkīsinin kendilerine i‘tâsı hakkındaki mukarrerâtın mesâlih-i zâtiyelerinin tesviyesi için me’zûn olanlar maâşâtına dahi şâmil tutulup tutulmayacağı Defter-i Hâkānî Nezâreti’nden istifsâr edilmesi üzerine bi’l-havâle Şûrâ-yı Devlet Heyet-i Umûmiyesi’nden i‘tâ kılınan mazbatanın bir fıkrasında hastalanarak tedâvi ve tebdîl-i havaya ihtiyâcı etibbâ tarafından varaka-i resmiye ile tasdîk olunması üzerine müddet-i münâsibe ile me’zûniyet verilen me’mûrîne Harcırâh Karârnâmesi’nin on üçüncü maddesi mûcebince müddet-i me’zûniyetde tâm maâş i‘tâsı lüzûmu ekseriyetle tezekkür kılınarak o vechile de ta‘mîmen teblîgāt icrâ edildiği anlaşılmış ise de Harcırâh Karârnâmesi’nin sâlifü’z-zikr on üçüncü maddesi tebdîl-i âb u hava zımnında me’zûn olan me’mûrînin müddet-i me’zûniyetleri maâşlarından nısfı kendilerine ve nısf-ı diğeri onlara vekâlet edeceklere verilir diye bi’t-ta‘dîl ale’l-usûl irâde-i seniyyeye iktirân etmiş olmasına nazaran Şûrâ-yı Devlet Heyet-i Umûmiyesince ta‘dîlât-ı vâkı‘a nazar-ı dikkate alınmaksızın esâs nizâmnâmede muharrer on üçüncü madde mûcebince tâm maâş i‘tâsı lüzûmuna dâir verilen karâr el-yevm mevcûd olmayan bir madde-i nizâmiyeye ibtinâ ettirilmiş olmasına göre tatbîk ve icrâ edilemeyeceği tabî‘idir, bunlara müddet-i me’zûniyetlerinde verilecek maâşât hakkındaki esâs iş‘âra gelince îfâ-yı farîza-i hâcc-ı şerîf için istihsâl-ı me’zûniyet edenlere müddet-i me’zûniyetlerinde tâm maâş i‘tâsı sâlifü’z-zikr mevâdd-ı mu‘addelede de kabûl edilmiş olup îfâsı si‘a-i hâl ile meşrût olan hacc husûsunda bahş olunan şu maddenin yed-i ihtiyârda bulunmayan hastalık gibi esbâb-ı mücbireden dolayı istihsâl-i me’zûniyete mecbûr olan me’mûrîn hakkında kabûl ve tatbîk olunup da kalır ise de bâlâda beyân olunduğu vechile tebdîl-i hava zımnında me’zûn olan me’mûrîne tâm maâş i‘tâsı hakkındaki on üçüncü madde nısf maâş i‘tâsı sûretinde ve usûlü dâiresinde ta‘dîl edilmiş olmasına mebnî tebdîl-i âb ve hava için me’zûn olan me’mûrîn hakkında madde-i mu‘addele mûcebince îfâ-yı mu‘âmele zarûri bulunduğunun cevâben Defter-i Hâkānî Nezâreti’ne ve ta‘mîmen devâir-i sâireye teblîği tezekkür kılındı, ol bâbda emr u fermân hazret-i men-lehu’l-emrindir. Fî 7 Muharrem sene 1328 ve fî 6 Kânûn-ı sânî sene 1325.