Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 571 Hüküm no: 700 Orijinal metin no: [122b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hatice bt. Ali’nin tüm eşyasını Reis Mehmed b. Kasım’a hibe etmesi Mahmiye-i İstanbul’da Ördek Kasab mahallesi sâkinelerinden olup zâtı ma‘rifet-i şer‘iyye ile ârifân mahalle-i mezbûre sâkinlerinden imâm Mahmud Efendi b. Hüsnü ve Müezzin Mustafa Çelebi b. İbrahim Çelebi nâm kimesneler ta‘rîfleriyle mu‘arrefe olan Hatice bt. Ali nâm hâtun meclis-i şer‘-i şerîfde menzilinde ma‘an sâkine olduğu bâ‘isü hâze’l-kitâb Reis Mehmed b. Kasım nâm kimesne mahzarında ikrâr ve takrîr-i kelâm edip eşyâmdan yedi köhne minder ve dört köhne çatma yastık ve on köhne yastık ve iki köhne yan keçesi ve üç köhne döşek ve bir kaliçe ve bir leğen ve iki ibrik ve bir güğüm ve dört tencere ve üç demirli sandık mezbûr Mehmed’e hibe-i sahîha-i şer‘iyye ile hibe ve teslîm ol dahi meclis-i hibede ittihâb ve tesellüm ve kabz eyledi ba‘de’l-yevm zikr olunan eşyâ-i mezbûr Mehmed’in mülk-i mevhûbu olup benim kat‘â eşyâ-i mezkûrede ve menzilde mevcûd olan kalîl ve kesîr ve sâir eşyâda ve bi’l-cümle hâlâ lâbise olduğum işbu köhne libâsdan gayrı ism-i mâl ıtlâk olunur şeyim yoktur ve bir şeye mâlike değilim, cümlesi mezbûr Mehmed’in mülkü dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mahmud Efendi b. Hasan el-İmâm, Mustafa Halîfe el-Müezzin, İshak Efendi b. Ali.