İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 453 Hüküm no: 507 Orijinal metin no: [207-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Beyoğlu Hüseyin Ağa mahallesinde otururken vârissiz ölen Karadağlı Bofamic adlı kadının terekesi Bâb-ı Âlî Nezâret-i Umûr-ı Hâriciye Umûr-ı Siyâsiyât Müdîriyet-i Umûmiyesi Devâir-i Vilâyât Kalemi 37 Hülâsa: Karadağlı bir kadının terekesine dâir. Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir, Beyoğlu’nda Hüseyin Ağa mahallesinde Bostan sokağında on yedi numaralı hânede sâkine iken bilâ-vâris vefât etmesinden nâşî bin üç yüz on sekiz sene-i Hicriyyesi’nde Evkāf-ı Hümâyûn Beytü’l-mâl Kassâmlığınca terekesi tahrîr edilen Bofamic? Nâm kadının verâseti hakkında Rumeli Kādıaskerliği’nde rü’yet edilmekde ve hazîne-i evkāfında alâkadâr bulunmakta olduğu bir da‘vâda Karadağ Sefâreti tercümanının hazır bulundurulduğu istihbâr kılınmış olup Karadağlıların memâlik-i Osmâniye’de bir gûnâ imtiyâzları olmadığı cihetle mezkûr da‘vâda tercüman bulundurulmamasının lâzım gelenlere emr ve teblîği husûsunun taraf-ı âlî-i fetvâ-penâhîlerine arz ve iş‘ârı Evkāf-ı Hümâyûn Nezâreti’nden bâ-tezkire izbâr kılınmıştır. Berlin Ahidnâmesi mûcebince memâlik-i Osmâniye’de hukūk-ı düvel kavâ‘id-i umûmiyesine tevfîkan mu‘âmele gören ve binâberîn hiçbir imtiyâzı hâiz bulunmayan Karadağlılar doğrudan doğruya mehâkim ve devâir-i Osmâniye’ye tâbi‘ oldukları cihetle da‘vâlarında kat‘iyyen tercüman bulundurmamak lâzım geleceğinin îcâb eden devâir ve mehâkime ta‘mîmen teblîği menût-ı irâde-i aliyye-i meşîhat-penâhîleridir, ol bâbda emr u fermân hazret-i veliyyü’l-emrindir. Fî 16 Ramazan sene 1328 ve fî 7 Eylül sene 1326. Hâriciye Nâzırı Nâmına Müsteşâr Ohannes