İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 455 Hüküm no: 509 Orijinal metin no: [208-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Medine-i Münevvere’nin elviye-i gayr-ı mülhaka tarzında idaresi Bâb-ı Âlî Dâire-i Sadâret Tahrîrât Kalemi 175 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir, Medîne-i Münevvere Muhâfızlığı’nda bulunan zâtı vezâif-i mülkiye ile muvazzaf ve Dâhiliye Nezâreti’ne merbût olup muhâfızlık unvânının vezâif-i asliyesiyle münâsibi görülememesine ve Medîne-i Münevvere ile Dersa‘âdet arasında telgraf ve şimendüfer hutûtu mevcûd ve bilâ-vâsıta te‘âtî-i muhâberât kābil olması hasebiyle belde-i tâhireye âid muhâberât-ı resmiye bi’z-zarûre elviye-i gayr-ı mülhaka gibi doğrudan doğruya muhâfızlıkla cereyân etmekte bulunmasına binâen ve belde-i tâhirenin şeref ve kudsiyetine nazaran mutasarrıf makāmında olan zât kemâ-kân muhâfız unvânıyla yâd edilmek üzere mezkûr sancağın elviye-i gayr-ı mülhaka tarzında idâresi husûsuna nezâret-i müşârün-ileyhânın tezkire-i muhavvelesi üzerine Şûrâ-yı Devlet ve Meclis-i Mahsûs-ı Vükelâ karârıyla bi’l-istîzân irâde-i seniyye-i cenâb-ı hilâfet-penâhî şeref-sudûr buyrularak nezâret-i müşârün-ileyhâ ile devâir-i müte‘allikaya teblîgāt icrâ kılınmış olmağla ol bâbda emr u irâde hazret-i men-lehu’l-emrindir. Fî 21 Receb sene 1328 ve fî 15 Temmuz sene 1326. Sadrıa‘zam Hakkı