İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 456 Hüküm no: 510 Orijinal metin no: [208-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hukuk mektebi mezunlarının mahkemelerde stajerlik yapmaları Adliye ve Mezâhib Nezâreti Tahrîrât Kalemi Aded: 130 Ma‘rûz-ı dâ‘î-i dîrîneleridir, Cihet-i adliyede istihsâl-i me’mûriyet arzusunda bulunan mekteb-i hukūk me’zûnlarının müktesebât-ı nazariyelerini tevsî‘ için mehâkim-i merkeziyede nizâmen îfâsına mecbûr oldukları altı ay mülâzemetle mukābil kendilerine mu‘âmelât-ı hukūkiyeyi kısa bir müddet zarfında ve amelî bir tarzda tedrîs ve irâe etmek maksadıyla bir tatbîkāt dershânesi küşâd edilmiş olduğundan dâire-i celîleleri mensûbîninden mezkûr dershâneye devam arzusunda bulunan mekteb me’zûnlarının mektebe müdâvim bulundukları sırada irâe buyrulan mu‘âmele-i müsâ‘adekârâne cümlesinden olarak mezkûr dershâneye devamları husûsuna da müsâ‘ade buyurulması menût-ı re’y-i âlî-i meşîhat-penâhîleridir, ol bâbda emr u fermân hazret-i men-lehu’l-emrindir. Fî 19 Şa‘bân sene 1328 ve fî 10 Ağustos sene 1326. Adliye Nâzırı Nâmına Müsteşâr Nedim