İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 457 Hüküm no: 512 Orijinal metin no: [209-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Faili meçhul cinayet davalarında, cinayetin işlendiği ve kimsenin mülkü olmayan yer köy sınırları içinde ise köy halkından diyet alınması (kasâme) Bâb-ı Âlî Dâire-i Sadâret Tahrîrât Kalemi 246 Taraf-ı Vâlâ-yı Hazret-i Meşîhat-penâhî’ye, Ma‘rûz-ı bende-i dîrîneleridir ki, Fî 11 Ağustos sene 326 târihli ve yüz yetmiş altı numaralı tezkire-i aliyye-i meşîhat-penâhîlerine cevâbdır. Bir karye hudûdu dâhilinde ve kimsenin mülkü olmayan hâli bir mevki‘de fâ‘illeri mechûl olarak vukū‘a gelen cinâyâtdan dolayı o karye ahâlîsinden diyet ahzı lâzım geleceğine dâir sebk eden teblîğ üzerine Adliye Nezâret-i celîlesinden vârid olan tezkire-i cevâbîyece bu bâbda yazılan fetvâ-yı şerîfede dahi gösterildiği vechile o karye ahâlîsinden kasâme sûretiyle tazmînât ahzı hem hükm-i şer‘îye muvâfık hem de îcâbât-ı hâl ve zamana mutâbık olmağla beraber usûl-ı mezkûre zâten mer‘î bulunmasına nazaran bu misillü kasâme da‘vâlarının merci‘-i rü’yeti olan mehâkim-i şer‘iyece teshîl-i rü’yeti esbâbının istikmâli lüzûmu inbâ ve Dâhiliye Nezâret-i celîlesine de teblîgāt îfâ olunmağla Bâb-ı Vâlâ-yı Fetvâ-penâhîlerince de îcâb edenlere teblîgāt-ı lâzımenin îfâsı bâbında emr u irâde hazret-i şer‘iye lehu’l-emrindir. Fî 14 Şevval sene 1328 ve fî 5 Teşrîn-i evvel sene 1326. Sadrıa‘zam Hakkı