İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 458 Hüküm no: 513 Orijinal metin no: [209-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Şer‘iye mahkemelerinden sâdır olan ihzar müzekkirelerinin nizamiye mahkemelerinden sâdır olanlarla aynı kuvvette olduğu Meşîhat 33 İstanbul Kādılığı’na, Fazîletlü Efendim Hazretleri, Hükkâm-ı şer‘iye tarafından mahkemeye ihzârı mutazammın yazılan tezâkirin ihzâr müzekkireleri mâhiyet ve kuvvetinde ad olunmaması mehâkim-i mezkûreye celb ve ihzârı îcâb eden eşhâsın da‘vet-i vâkı‘aya adem-i icâbetlerini ve bi’n-netîce şer‘-ı ibâdın ziyâ‘ını mûceb olacağı mülâhazasına göre îcâbının Şûrâ-yı Devletce teemmülü lüzûmuna dâir Dâhiliye Nezâret-i celîlesinden gönderilen tezkire üzerine Mecelle’nin bin sekiz yüz otuz üçüncü maddesine nazaran mehâkim-i şer‘iyeden sâdır olan ihzâr müzekkireleriyle mehâkim-i nizâmiyeden sâdır olan ihzâr müzekkireleri beyninde bir fark olmadığı gibi her ikisi için dahi inde’l-îcâb cebr isti‘mâli kānûnî bulunduğundan mehâkim-i şer‘iyeden sâdır olan ihzâr müzekkireleri hakkında da mehâkim-i nizâmiyede tatbîk olunan usûlün muhâfazası taht-ı vücûbda bulunduğunu mutazammın Şûrâ-yı Devlet Tanzîmât Dâiresi’nden i‘tâ olunan mazbata sûretinin leffiyle vârid olan fî 8 Şevval sene 1328 târihli ve iki yüz otuz sekiz adedli tezkire-i sâmîye üzerine keyfiyet ta‘mîmen hükkâm-ı şer‘iyeye teblîğ ve mülhakāt nüvvâbına gönderilmek üzere işbu tahrîrâtın nüsah-ı kâfiyesi leffen isrâ olunmağla ona göre îfâ-yı mu‘âmele olunması siyâkında tezkire-i mecî terkīm kılındı. Fî selhi Şevval sene 1328 ve 21 Teşrîn-i evvel sene 326. Şeyhülislâm Musa Kâzım