İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 461 Hüküm no: 519 Orijinal metin no: [211-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İlmiye Dairesi ile ilgili kanun, nizam ve talimatın düzenli bir şekilde ilanı Sadâret 248 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir ki, 28 Nisan sene 326 târihli tezkireye zeyldir. Mer‘iyyet-i ahkâmına bi’l-istîzân irâde-i seniyye-i cenâb-ı pâdişâhî şeref-müte‘allik buyurulmuş olan kavânîn ve nizâmâtın mevki‘-i icrâya vaz‘ı için dâire-i müte‘allikasına teblîğini müte‘âkıben dâire-i mezkûrece Cerîde-i Resmiye ile i‘lânı usûl-i müttehize îcâbından ve lâzımeden olduğu hâlde bazı devâirce bu usûle ihtimâm edilememekde olduğu anlaşılıp kavânîn ve nizâmâtdan henüz neşredilmemiş olanların Takvîm-i Vakāyi‘e derci için îcâb eden dâirelere mürâca‘atla ta‘kībâtda bulunmak üzere dâire-i sadâretce bir efendinin me’mûr edilerek kavânîn ve nizâmât-ı gayr-ı münteşire Takvîm-i Vakāyi‘ İdâresi’ne irsâl ettirilmiş ve usûl-ı mebhûsün-anhânın ba‘de-ezîn hüsn-i tatbîkine her dâirece i‘tinâ edilmesi muktezî olup devâir-i sâireye de teblîgāt icrâ edilmiş olduğundan Dâire-i Celîle-i İlmiye’ye müte‘allik kavânîn ve nizâmât ve ta‘lîmâtın dahi ba‘de-ezîn bilâ-teahhur muntazaman i‘lânına derece-i nihâyede i‘tinâ olunması zımnında îcâb edenlere tenbîhât-ı kat‘iyye îfâsına himem-i aliyye-i meşîhat-penâhîleri derkâr buyurulmak bâbında emr u irâde hazret-i men-lehu’l-emrindir. Fî 14 Şevval sene 1328 ve fî 5 Teşrîn-i evvel sene 1326. Sadrıa‘zam Hakkı