İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 463 Hüküm no: 521 Orijinal metin no: [212-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Memur ve kâtiplerden nizamiye muvazzaf hizmetine dahil olanların memuriyetlerinden ayrıldıkları tarihten itibaren azledilmiş sayılacakları Sadâret 277 Taraf-ı Âlî-i Hazret-i Meşîhat-penâhî’ye, Ma‘rûz-ı bende-i dîrîneleridir, Me’mûrîn ve ketebeden hizmet-i muvazzafa-i nizâmiyeye dâhil olanların me’mûriyetlerinden infikâki târihinden i‘tibâren mün‘azil ad olunacakları hakkındaki madde-i nizâmiyenin neşrinden mukaddem dâhil-i esnân olarak taht-ı silâha alınmış ve karâr-ı sâbık dâiresinde vazîfeleri vekâletle idâre olunup kendilerine nısf maâş i‘tâ edilmekde bulunmuş olan ketebe-i Adliye’nin bazı taraflarca sâlifü’z-zikr madde-i nizâmiye hükmüne istinâden kat‘-ı maâşâtı cihetine gidildiğinden bahisle istifsâr-ı mu‘âmeleyi mutazammın Adliye Nezâret-i celîlesinden mukaddemâ vârid olan tezkire üzerine bi’l-havâle Şûrâ-yı Devlet Tanzîmât Dâiresi’nden i‘tâ olunan mazbatada neşrolunacak kavânînin muhaffef cezâ olan ahkâmından mâ‘adâsının mâ-kabline şümûlü olamayacağı cihetle mevzû‘-ı bahs olan madde-i nizâmiye târih-i neşrinden sonra me’mûriyetlerinden infikâk edenlere mahsûs olup madde-i mezkûrenin neşrinden evvel me’mûriyetlerinden infikâk edenlere işmâli mümkün olamayacağı inbâ ve mûcebince devâire teblîgāt icrâ kılınmağla Bâb-ı Vâlâ-yı Meşîhat-penâhîlerince de ona göre îfâ-yı mu‘âmeleye himem-i aliyye-i fetvâ-penâhîleri derkâr buyurulmak bâbında emr u irâde hazret-i men-lehu’l-emrindir. Fî 7 Zilka‘de sene 1328 ve fî 27 Teşrîn-i evvel sene 1326. Sadrıa‘zam Hakkı