İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 464 Hüküm no: 522 Orijinal metin no: [212-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. 10 Temmuz 1324 tarihinden önceki damga resmi ceza-yı nakdilerinin sahiplerine iadesi Sadâret 48 Taraf-ı Âlî-i Meşîhat-penâhî’ye, Ma‘rûz-ı bende-i dîrîneleridir, Üç yüz yirmi dört senesi evâilinde ahz u istifâ edilen pul cezâ-yı nakdîlerinin ashâbına iâdesi hakkında Defter-i Hâkānî Nezâret-i Aliyyesi’nin tezkiresi üzerine bi’l-havâle Şûrâ-yı Devlet Tanzîmât Dâiresi’nden i‘tâ olunan mazbatanın sûreti leffen savb-ı âlî-i meşîhat-penâhîlerine isrâ ve bi’l-umûm devâir-i merkeziyeye teblîgāt icrâ kılınmış olmağla Dâire-i Celîle-i Şeyhülislâmîlerince de mûcebince îfâ-yı muktezâsı bâbında emr u irâde hazret-i men-lehu’l-emrindir. Fî 22 Rebî‘ülâhir sene 329 ve fî 9 Nisan sene 327. Sadrıa‘zam Hakkı [213] Sadâret Sûret, Defter-i hâkānî Nezâreti’nin Şûrâ-yı Devlet’e havâle buyrulan fî 16 Şubat sene 326 târihli ve üç yüz doksan üç numaralı tezkiresi Tanzîmât Dâiresi’nde kırâet olundu. Tezkire-i mezkûrede fî 10 Temmuz sene 324 târihinden mukaddemki cerâimin kānûn-ı mansûs ile ma‘füv tutulması karârının damga resmi cezâ-yı nakdîlerine de teşmîliyle cümlesi hakkında seyyânen mu‘âmele îfâsı muvâfık-ı ma‘delet olacağı 17 Teşrîn-i evvel sene 326 târihli tezkire-i sâmîye ile teblîğ buyrulan Şûrâ-yı Devlet Heyet-i Umûmiyesi karârı iktizâsından bulunduğu cihetle 10 Temmuz sene 324 târihinden mukaddemki tevârih ile müverrah senedât ashâbıyla onlar üzerine mu‘âmele icrâ edenlere âid olup bazı mu‘âmelât ve muhâberât netîcesine intizâren şimdiye kadar istifâ edilmemiş olan cezâ-yı nakdîlerin tahsîl edilmemesi lüzûmu derkâr ise de bu kabîl senedât ashâbından bazıları tarafından vâki‘ olan taleb ve muvâfakata binâen sene-i hâliye evâilinde ahz u istifâ olunan pul cezâ-yı nakdîlerinin heyet-i müşârün-ileyhânın sâlifü’l-beyân karârına istinâden bu kere reddi taleb olunmakta olup işbu cezâ-yı nakdîlerden şimdiye kadar îrâd kaydedilmiş olan mebâliğ iki bin küsûr guruşdan ibâret olup hîn-i tahsîlde hâsılât-ı müteferrika nâmıyla îrâd edilmiş ve mürâca‘at-ı vâkı‘a dahi muhikk ve şâyân-ı kabûl görülmüş olmasına nazaran ânifü’z-zikr irâde-i aliyye târihinden mukaddem vukū‘ bulan bu kabîl pul cezâları tahsîlâtının ashâbına reddi îcâb edip etmeyeceği istifsâr olunmuşdur. Îcâbı lede’t-teemmül 10 Temmuz sene 324 târihinden mukaddemki cerâime âid afv-ı umûminin damga resmi cezâ-yı nakdîlerine de teşmîli 17 Teşrîn-i evvel sene 326 târihli tezkire-i sâmîye ile teblîğ buyrulan karâr iktizâsından olmasına ve işbu tezkire-i sâmîye târihinden mukaddem ahz u istifâ edilen cezâ-yı nakdîlerin adem-i reddi muhâlif-i karâr olduğu tabî‘i bulunmasına binâen bunların ashâbına iâdesi lâzım geleceğinin nezâret-i müşârün-ileyhâya teblîği tezekkür kılındı, emr u fermân hazret-i men-lehu’l-emrindir. Fî 25 Rebî‘ülâhir sene 329 ve fî 17 Mart sene 327.