İstanbul Mahkemesi 334 Numaralı Sicil (H. 1280-1329 / M. 1863-1911) cilt: 99, sayfa: 465 Hüküm no: 524 Orijinal metin no: [214-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Anbarlara teslim edilen eşyaya mukabil müteahhitlere verilen makbuz senetlerine pul yapıştırılması Sadâret’den 278 Taraf-ı Âlî-i Meşîhat-penâhî’ye, Ma‘rûz-ı bende-i dîrîneleridir ki, Anbârlara teslîm edilen eşyâya mukābil müte‘ahhidlere verilen makbûz senedâtından meblağ-ı mu‘ayyeni hâvî olmayanlara Resm-i Maktû‘ Ta‘rifesi’ne tatbîkan yirmi paralık pul ilsâk edilmekde ise de bununla damga resmi tamamen îfâ edilip edilmediği Dîvân-ı Muhâsebât Riyâseti’nden lede’l-istifsâr zikrolunan makbûz senedleriyle mu‘âyene şehâdetnâmeleri medâr-ı ihticâc olacak evrâkdan ma‘dûd olmak i‘tibâriyle Damga Nizâmnâmesi mûcebince pul resmine tâbi‘ ise de bunlardan alınmakta olan resmin mükerrer olduğu hakkında dermeyân olunan mütâla‘aya nazaran bu cihetin tefsîri îcâb edeceği beyânıyla bu bâbda bir karâr ittihâzı lüzûmunun cevâben iş‘âr edildiğine dâir Harbiye Nezâret-i celîlesinden vârid olan tezkire Şûrâ-yı Devlet’e lede’l-havâle Tanzîmât Dâiresi’nden i‘tâ kılınan mazbatada Damga Nizâmnâmesi’nde resm-i maktû‘ ta‘rifesinin seksen beşinci numarasının bir fıkrasında kabz ve ibrâyı hâvî her nev‘ evrâkdan meblağ-ı mu‘ayyeni hâvî olmayanlara yirmi paralık pul ilsâk edileceği gösterilmesine ve senedât-ı mezkûrenin damga resmine tâbi‘iyeti hakkındaki sarâhat-i kānûniyeye nazaran bunlara pul ilsâkı zarûri olduğu inbâ ve ta‘mîmen devâire teblîgāt icrâ kılınmış olmağla iktizâsının îfâsına himmet buyurulması bâbında emr u irâde hazret-i men-lehu’l-emrindir. Fî 11 Zilka‘de sene 328 ve fî 31 Teşrîn-i evvel sene 326. Sadrıa‘zam Hakkı