Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 572 Hüküm no: 702 Orijinal metin no: [122b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Halil’e borcunu ödemesi için kocası Hüseyin Çelebi b. Ahmed’e tembih Mahmiye-i İstanbul’da Uzun Yusuf mahallesinde sâkine Ayşe bt. Halil nâm hâtun meclis-i şer‘-i şerîf-i enverde zevci Hüseyin Çelebi b. Ahmed mahzarında üzerine da‘vâ ve takrîr-i kelâm edip yedimde olan işbu temessükü nâtık olduğu üzre zevcim mezbûr Hüseyin zimmetinde cihet-i karz-ı şer‘îden altı yüz altmış iki buçuk guruş hakkım olmağla hâlâ mezbûr Hüseyin Çelebi’ye suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Hüseyin Çelebi cevâbında cihet-i mezkûreden zevcem müdde‘iye-i mezbûreye zimmetimde bi hakkın seksen guruş deynim olup mâ‘adâsını kâziben ikrâr edip ve yedine işbu altı yüz altmış iki buçuk guruşu nâtık deyn temessükü vermişdim deyicek müdde‘iye-i mezbûreye zevci merkūm Hüseyin Çelebi meblağ-ı mezbûrun yüz seksen guruşundan mâ‘adâsını kâziben ikrâr etmeyip ve kendi ziyâde da‘vâsında mubtıla olmadığına yemîn teklîf olundukda müdde‘iye-i mezbûre Ayşe Hâtun dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince temessük-i mezbûr nâtık olduğu üzre meblağ-ı merkūm altı yüz altmış iki buçuk guruşu müdde‘iye-i [123a] mezbûre Ayşe Hâtun’a tamâmen edâ ve teslîme zevci merkūm Hüseyin Çelebi’ye tenbîh olunmağın mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: Mumcu Mehmed Beşe b. Abdurrahman, İbrahim Çelebi b. Ahmed, Abdi Çelebi kāimmakām, Ebûbekir b. Hüseyin.