Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 573 Hüküm no: 703 Orijinal metin no: [123a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yorgi v. Mihal’in mirasçılarına olan borcunu ödemesi için Yorgi v. Vasil’e tembih Varilci tâifesinden olup medîne-i Galata’da Sultan Bayezid mahallesinde sâkin iken bundan akdem hâlik olan Yorgi v. Mihal nâm zimmînin verâseti zevce-i metrûkesi Asanina bt. Deryako ve sulbiye kebîre kızları Fotini ve Despina ve sulbiye sagīre kızı Hırosine’ye münhasıra olduğu şer‘an zâhir ve mütehakkik oldukdan sonra mezbûre İsayşa kendi tarafından asâleten ve sagīre-i mezbûrenin mansûbe vasîsi olmağla vesâyeten ve mezbûretân Fotini ve Despina tarafından husûs-ı âti’l-beyâna vekîl-i müseccelleri olmağla vekâleten meclis-i şer‘-i hatîr-i lâzımü’t-tevkīrde yine tâife-i mezbûreden olup medîne-i mezbûrede vâki‘ Karakikapı kurbunda sâkin ve meclis-i şer‘de fermân-ı âlî ile ihzâr olunan diğer Yorgi v. Vasil nâm zimmî muvâcehesinde üzerine da‘vâ ve takrîr-i kelâm edip târih-i kitâbdan altı ay mukaddem mûrisimiz hâlik-i mezbûrun dükkânında mevcûd olup irsen bize isâbet ve intikāl eden beynimizde ilm-i şer‘î ile ma‘lûm fıçıları ve variller ve sâir dükkân âlâtını, ben asâleten ve vesâyeten ve vekâleten mezbûr diğer Yorgi’ye târih-i mezbûrdan altı ay tamâmına değin mev‘ûd ve müeccel altmış bir bin akçeye bey‘-i bâtt-ı kat‘î ile bi safkatin vâhidetin bey‘ ve teslîm ol dahi iştirâ ve kabûl etmişidi hâlâ va‘de-i mezbûre hulûl etmekle mezbûr diğer Yorgi’ye suâl olunup semen-i mezbûr altmış bir bin akçeyi bana edâ ve teslîme tenbîh olunmak matlûbumdur dedikde gıbbe’s-suâl ve akībe’l-inkâr, müdde‘iye-i mezbûreden sıdk-ı makāline beyyine taleb olundukda tâife-i mezbûrenin kethüdâsı Nikola v. Yani ve tâife-i mezbûreden Samatya iskelesi kurbunda sâkin Andon v. Yorgi ve mahalle-i mezbûrede sâkin Yakomi v. Yani ve Yarıcı Yanaki v. Nikola ve Yorgi v. Nikola ve Yani v. Andon nâm zimmîler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka târih-i kitâbdan altı ay mukaddem hâlik-i mezbûr Yorgi’nin dükkânında mevcûd olup irsen verese-i merkūma isâbet ve intikāl eden beynlerinde ilm-i şer‘î ile ma‘lûm fıçılar ve variller ve sâir dükkân âlâtını işbu müdde‘iye-i mezbûre ber vech-i muharrer asâleten ve vesâyeten ve vekâleten işbu mezbûr diğer Yorgi’ye bey‘-i bâtt-ı kat‘î ile târih-i mezbûrdan altı ay tamâmına değin mev‘ûd ve müeccel altmış bir bin akçeye bi safkatin vâhidetin bizim huzûrumda bey‘ ve teslîm ol dahi iştirâ ve kabûl etmişidi biz bu husûsa bu vech üzre şâhidleriz şehâdet dahi ederiz deyû her biri edâ-i şehâdet-i şer‘iyye ettiklerinde ba‘de ri‘âyeti şerâiti’l-kabûl şehâdetleri makbûle olmağın mûcebince ba‘de’l-hükm semeni olan meblağ-ı mezbûr altmış bir bin akçeyi müdde‘iye-i mezbûreye edâ ve teslîme müşterî-i merkūm diğer Yorgi’ye tenbîh olunup mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: İslâm Çavuş, Çukadâr Ahmed Beşe, Mustafa Ağa [b.] Abdurrahman, kethüdâ Ahmed Ağa.