Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 574 Hüküm no: 704 Orijinal metin no: [123b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Saliha bt. Hacı Ali’nin menzilini Gevher bt. Ahmed’e sattığı Vilâyet-i Anadolu’da Bilecik kazâsına tâbi‘ Başköy nâm karyede sâkine olup zâtını ma‘rifet-i şer‘iyye ile ârifân olan el-Hâc Mehmed Efendi b. Ahmed ve Ali b. Mehmed ta‘rîfleriyle mu‘arrefe olan Sâliha bt. el-Hâc Ali nâm hâtun meclis-i şer‘-i şerîf-i enverde mahmiye-i İstanbul’da Kovacı Dede mahallesinde sâkine bâ‘isetü’l-kitâb Gevher bt. Ahmed tarafından ikrâr-ı âti’z-zikri tasdîke vekîl olduğu zâtını ma‘rifet-i şer‘iyye ile ârifân olan Ali Efendi b. Mehmed ve el-Hâc Mehmed Efendi b. Ahmed şehâdetleriyle şer‘an sâbit olan el-Hâc Veli b. Ömer mahzarında bi tav‘ihâ ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan müvekkile-i mezbûre mülkü ve iki tarafdan mahalle-i mezbûre avârızı vakfı olup Fâtıma Hâtun tasarrufunda olan menzil ve bir tarafdan tarîk-i hâs ile mahdûd iki bâb tahtânî oda ve bir sofa ve bir kenîf ve cüneyneyi müştemil mülk menzilimi cümle-i tevâbi‘ ve levâhıkı ve kâffe-i menâfi‘ ve merâfıkı ile müvekkile-i mezbûre Gevher Hâtun’a tarafeynden îcâb ve kabûlü hâvî bey‘-i bâtt-ı sahîh-i şer‘î ile elli esedî guruşa bey‘ ve teslîm edip ol dahi ber vech-i muharrer iştirâ ve kabz ve tesellüm eylediğinden sonra semeni olan meblağ-ı mezbûru yedinden tamâmen ahz u kabz eyledim ba‘de’l-yevm menzil-i mahdûd-ı mezkûru mezbûre Gevher Hâtun’un mülk-i müşterâsıdır keyfe mâ yeşâ ve yahtâr mutasarrıfe olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Ramazâni’l-mübârek li sene seb‘a ve tis‘în ve elf. Şuhûdü’l-hâl: El-Hâc Hasan el-mütevellî, el-Hâc Mehmed Efendi b. Ahmed, Ali Efendi b. Mehmed, Abdülbâkī Çelebi b. ( ) Mahmud Çelebi b. ( ), el-Hâc Ömer Ağa b. ( ), İbrahim b. Ahmed.