Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 64 Hüküm no: 21 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ortaköy'de Abram adlı Yahudinin evini basan firari eşkıyanın bulundukları yerde yakalanarak İstanbul'a gönderilmeleri emri Efâzılü’l-kuzât ve’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘u a‘lâmi’ş-şerî‘ati ve’d-dîn vârisü’l-enbiyâi ve’l-mürselîn el-muhtassu bi-mezîdi inâyeti’l-meliki’l-mu‘izz mevlânâ Üsküdar kādısı -zîde fazluhû- iftihârü’l-emâcid ve’l-ekârim câmi‘ü’l-mehâmid ve’l-mekârim el-muhtassu bi-mezîdi inâyeti’l-meliki’llâhi’d-dâim bi’l-fi‘il Hâssa Bostancıbaşısı Halil -dâme mecdühû- ve mefâhirü’l-kuzâ[t] ve’l-hükkâm ma‘denü’l-fazl ve’l-ekârim İznikmid kādısı ve Gekbüze ve Karamürsel ve Yalakâbad kādıları nâibleri -zîde fazluhum- tevkī‘-i refî‘-i hümâyûn vâsıl olucak ma‘lûm ola ki Abram nâm Yahûdi südde-i sa‘âdetime arzuhâl edip Ortaköy’de bundan akdem hânesin basan haydûd eşkıyâsından ( ) nâm şakī Edirne’de ahz ve refîklerinden ( ) nâm şakī taht-ı kazânıza firâr üzere oldukları bildirilip bulundukları yerlerde ahz ve Âsitâne-i sa‘âdetime ihzâr olunmaları bâbında hükm-i hümâyûnum ricâ etmeğin sen ki bostancıbaşı-yı mûmâ-ileyhsin, ma‘rifetinle zikr olunan şakīler bulundukları yerlerde ahz ve Âsitâne-i sa‘âdetime ihzâr olup ammâ bu bahâne ile ahz ü celb olmakdan ihtirâz olunmak emrim olmuşdur. Buyurdum ki, vusûl buldukda bu bâbda sâdır olan emrim üzere amel, dahi sen ki bostancıbaşı-yı mûmâ-ileyhsin, sâlifü’z-zikr haydûd eşkıyâsı taht-ı kazânızda bulunduğu mahâlde ahz ve Âsitâne-i sa‘âdetime ihzâr eyleyesiz, ammâ mukayyed olasız ki bu bahâne ile kendü hâllerinde olanları ahz u celb olmakdan hilâf-ı şer‘-i şerîf kimesneye zulm ve ta‘addîden be-gāyet ihtirâz eyleyip emr-i şerîfim ile âmil olasız, şöyle bilesiz, alâmet-i şerîfime i‘timâd kılasız. Tahrîren fî-evâili Safer sene selâsîn ve mi'e ve elf. Kostantıniyye. İzzetlü bostancıbaşı ağa İstanbul’da Ortaköy’de sâkin Abram Yahûdinin hânesin basan haydûd eşkıyâsının birkaç neferi Edirne’den ahzolunmağla ahzolunan merkūmların üzerlerinde olan eşyâları dahi mübâşirleri olan haseki ma‘rifetiyle ve ma‘rifet-i şer‘le tefahhus ve zuhûra getirmekle ziyâde dikkat edip ve bu ahzolunan şakīlerin refîkleri dahi mazanne olan mahallerden gereği gibi tecessüs ve tefahhus ve haber alındığı mahallerde bi-eyyi hâlin mübâşirleri hasekiler ma‘rifetiyle ahz ve ele getirmesine bezl ü sa‘y ü dikkat eyleyesin. Fî 23 Zilhicce sene [1]129