Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 574 Hüküm no: 705 Orijinal metin no: [123b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Derviş b. Hüseyin’in kendisini yaralayan Hasan b. Abdullah ile sulh olması Çörekçi tâifesinden olup mahmiye-i İstanbul’da Sarıgez sûkunda sâkin Arnavud Derviş b. Hüseyin b. Sinan’ın li ebeveyn er karındaşı ve tarafından husûs-ı âti’l-beyâna vekîl olduğu Mustafa b. Mehmed ve Osman b. Ali şehâdetleriyle şer‘an sâbit olan Sinan nâm kimesne meclis-i şer‘-i şerîfde bâ‘isü hâze’l-kitâb Hasan b. Abdullah nâm mu‘takın mevlâsı ve tarafından husûs-ı câ’i’z-zikri tasdîke vekîl-i şer‘îsi olup yeniçerilerin elli yedi cemâ‘atine mahsûs oda yoldaşlarından olan Osman Beşe b. Mehmed mahzarında ikrâr ve takrîr-i kelâm edip mezbûr Hasan târih-i kitâbdan bir gün mukaddem karındaşım mezbûr Derviş sol omuzu altında ve sol eli üstünde bıçağıyla darb ve cerh etmekle mezbûr Derviş dahi husûs-ı mezbûru merkūmdan taleb ve da‘vâ eyledikde ol dahi inkâr etmeğin el-hâletü hâzihî beynlerinde ba‘de’n-nizâ‘ muslihûn tavassutuyla merkūm Hasan mecrûh-ı mezbûr Derviş’le yirmi guruş üzerine sulh oldukda ol dahi sulh-i mezbûru kabûl ve bedel-i sulh olan meblağ-ı mezbûr yirmi guruşu mezbûr Hasan yedinden ahz u kabz ettiğinden sonra cerh-i mezkûra ve mâ tehaddese minhuma müte‘allika âmme-i da‘vâdan mezbûr Hasan’ın zimmetini ibrâ ve iskāt edip ol dahi bedel-i sulha müte‘allika da‘vâdan merkūm Derviş’in zimmetini ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min Şevvâli’l-mu‘azzam li sene seb‘a ve tis‘în ve elf. Şuhûdü’l-hâl: El-Hâc Osman b. Ali, Hüseyin Ağa b. Hasan, Şâhin Ağa [b.] Abdullah.