Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 575 Hüküm no: 706 Orijinal metin no: [123b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Hasan’ın menzilini Hacı Mehmed Ağa b. Sinan’a bey‘ bi’l-istiğlâl yoluyla satması Mahmiye-i İstanbul’da Kızıltaş mahallesi sâkinlerinden Mehmed Ağa b. Hasan nâm kimesne meclis-i şer‘-i şerîf-i Ahmedî ve mahfil-i dîn-i münîf-i Muhammedîde işbu kitâbın sâhibi el-Hâc Mehmed Ağa b. Sinan mahzarında takrîr-i kelâm edip merkūm el-Hâc Mehmed Ağa yedinden istidâne ve ahz u kabz eylediğim bin kıt‘a esedî guruş ve yedinden safka-i vâhide ile iştirâ ve kabz eylediğim evsâfları beynimizde ma‘lûm bir re’s Kırımiyyü’l-asl Yusuf nâm gulâmım ile bir re’s Rûsiyyetü’l-asl Gülbûy nâm bikr-i câriye bahâlarından dahi dört yüz elli guruş ki cem‘an bin dört yüz elli esedî guruş merkūm Mehmed Ağa’ya zimmetimde edâsı lâzım deynim olmağla mahalle-i mezbûrede vâki‘ bir tarafdan Ali Ağa mülkü ve bir tarafdan Aşçıbaşı mülkü ve bir tarafdan Ali Çavuş mülkü ve bir tarafdan tarîk-i âm ile mahdûd büyût-ı adîdeyi müştemil mülk menzilimi cemî‘ tevâbi‘ ve levâhıkıyla merkūm el-Hâc Mehmed Ağa’ya meblağ-ı mezbûr bin dört yüz elli esedî guruşa bi tarîki’l-istiğlâl bey‘ ve teslîm ol dahi ber minvâl-i muharrer iştirâ ve kabûl [124a] ettiğinden sonra merkūm el-Hâc Mehmed Ağa menzil-i mahdûd-ı mezkûru ba‘de’t-tahliyyeti’ş-şer‘î ve’t-tekābuzi’l-mer‘î târih-i kitâbdan üç yüz bir gün tamâmına değin elli kıt‘a esedî guruşa bana îcâr ve teslîm ben dahi minvâl-i muharrer üzre istîcâr ve kabûl eyledim dedikde gıbbe’t-tasdîki’ş-şer‘î mukırr-ı merkūm Mehmed Ağa iâde-i kelâm edip eğer müddet-i mezbûre hulûlünde edâ-i deyn edemeyip meblağ-ı mezbûr bin dört yüz elli esedî guruşumu ve ücret-i merkūmemi edâya fazla kalırsa bana îsâle ve bunlar mütevakkıf olduğu umûrun küllîsine işbu hâzır bi’l-meclis Halil Çavuş b. Eyyûb’i tarafımdan azl ve in‘izâlden masûne vekâlet-i devriyye ile vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve merâsimi edâya ta‘ahhüd etmeğin mâ vaka‘a bi’t-taleb ketb olundu. Fi’l-yevmi’s-sâlis min Şevvâli’l-mükerrem li sene seb‘a ve tis‘în ve elf. Şuhûdü’l-hâl: Ahmed Efendi tâbi‘-i Efendi, Osman Efendi b. Mehmed, Hüseyin Efendi b. Mehmed, Ömer Ağa b. Yusuf, berber Hasan Çelebi b. Mustafa, Halil Ağa [b.] Eyyûb, İbrahim Efendi, Yusuf b. Abdullah.