Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 78 Hüküm no: 43 Orijinal metin no: [11b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Üsküdar sürsat bedeli malının tahsiline memur olan Halil Ağa'nın vekili Osman Ağa'ya yardımcı olması emri Fahrü’l-müderrisîni’l-kirâm nevâhî-i Üsküdar nüvvâbı efendiler el-mükerremûn, Ba‘de’t-tahiyyeti’s-sâfiye inhâ olunur ki, işbu bin yüz yirmi sekiz sene[sine] mahsûb olmak üzere Karamürsel ve Gekbüze nâhiyelerinden mâ‘adâ medîne-i Üsküdar kazâsından bâ-defter-i mevkūfât tahsîli fermân olunan beş bin beş yüz iki guruş ve bir rub‘ guruş bedel-i sürsat mâlının nısfı medîne-i mezbûre esnâfına ve nısf-ı âharı nevâhî-i Üsküdar’a tevzî‘ olunmak mu‘tâd-ı kadîm olmağın mârru’z-zikr beş bin beş yüz iki guruş ve bir rub‘ guruşun nısfı olan iki bin yedi yüz elli guruş ve beş parayı nevâhî-i Üsküdar’dan bâ-fermân-ı âlî kabza memûr olan fahrü’l-a‘yân Halil Ağa tarafından vekîl olan el-Hâc Osman Ağa yedine verilen mümzâ ve mahtûm defter mantûkunca nevâhî-i mezkûreden her birinin hissesine lâzım gelen bedel-i sürsat mâlını bir gün mukaddem cem‘ ü tahsîl ve mûmâ-ileyh el-Hâc Osman Ağa’ya teslîm olunmak üzere bi’l-iltimâs mürâsele tahrîr ve irsâl olundu, vusûlünde gerekdir ki yedinde olan fermân-ı âlî ve defter mûcebince nevâhî-i mezkûreden her birinin hissesine lâzım gelen bedel-i sürsat mâlını bir gün mukaddem cem‘ ve tahsîl etmeğe her biriniz dikkat-i tâm ve müsâmaha etmeyiniz ve’s-selâm. Fî-gurreti Rebî‘ülevvel sene [1]128 El-Fakīr el-Hâc Mehmed el-Kādı bi-medîneti Üsküdar. Kad vasale ileynâ fî 5 Rebî‘ülevvel sene [1]128