Bab Mahkemesi 46 Numaralı Sicil (H. 1096 - 1097 / M. 1685 - 1686) cilt: 19, sayfa: 576 Hüküm no: 707 Orijinal metin no: [124a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Abdullah’ın menzilinin yarısını, bazı eşyalarını ve mehrini kocası Ramazan Beşe b. Cafer’e hibe etmesi Mahmiye-i İstanbul’da el-Hâc Muhyiddin mahallesinde sâkine Ayşe Hâtun bt. Abdullah tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Ali Efendi b. Yusuf Efendi ve Hüseyin Beşe b. Hasan nâm kimesneler şehâdetleriyle şer‘an sâbit olan el-Hâc Ali b. el-Hâc Eşref nâm kimesne meclis-i şer‘-i şerîf-i enverde müvekkilem mezbûrenin zevci işbu bâ‘isü’l-kitâb Ramazan Beşe b. Cafer mahzarında bi’l-vekâle ikrâr-ı tâm ve takrîr-i kelâm edip müvekkile-i mezbûre Ayşe Hâtun zevci mezbûr Ramazan Beşe zimmetinde mütekarrir ve ma‘kūdun-aleyh olan iki bin iki yüz akçe mehr-i müeccelinin iki bin akçesini ve yedinde mülk ve hakkı olup mahrûse-i Edirne’de Aynacı mahallesinde vâki‘ bir tarafdan Mehmed Ağa mülküne ve bir tarafdan Dâye Hâtun mülküne ve bir tarafdan Saraylı Hâtun mülküne ve bir tarafdan tarîk-i âm ile mahdûd bir bâb fevkānî ve bir şehnişînli fevkānîde oda ve iki sofa ve eşcâr-ı müsmire ve gayr-ı müsmire bahçe ve havluyu müştemil menzilinin ba‘de’l-ifrâz ve’t-ta‘yîn ve vaz‘u’l-alâmeti’l-fâsıla nısf şehnişînli oda tarafında olan nısf-ı mu‘ayyen-i mümtâzını ve eşyâ-i memlûkesinden iki yan keçesi ve iki yemeni yorgan ve bir kumaş yorgan ve altı işleme yastık ve üç minder ve iki çarşaf ve bir beledî döşek ve bir orta kaliçesi ve üç sahan ve bir kefgir ve bir leğen ma‘a ibrik ve bir güğüm ve bir kebîr tencere sini zevci mezbûr Ramazan Beşe’ye mukaddemâ hibe-i sahîha-i şer‘iyye ile hibe ve temlîk ve teslîm ol dahi meclis-i hibede ittihâb ve kabûl ve kabz eyledi ba‘de’l-yevm mehr-i mezbûr mütâlebesinden zevci merkūm Ramazan’ın zimmeti berî olup ve nısf menzil-i mezbûr ile eşyâ-i mezkûre cümlesi dahi merkūm Ramazan Beşe’nin mülk-i mevhûbu ve hakk-ı sırfı olmuşdur keyfe mâ yeşâ ve yahtâr mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ min Şevvâl li sene seb‘a ve tis‘în ve elf. Şuhûdü’l-hâl: Yusuf Efendi el-Kadı, Mustafa b. Musli, Ahmed Efendi el-Müderris, el-Hâc Ahmed b. Mustafa, Himmet Beşe b. Mustafa, Hasan Beşe b. Süleyman ve gayruhüm mine’l-huzzâr.