Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 81 Hüküm no: 50 Orijinal metin no: [13b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Adalar nahiyesi serdarının görevden alınarak yerine on dördüncü sekbandan mütekaid Mehmed'in tayini Kıdvetü’n-nüvvâb ve’l-müteşerri‘în Adalar nâibi efendi -zîde ilmuhû- inhâ olunur ki, hâlâ kazâ-i merkūmede [yeni]çeri serdârı ref‘ olunup yerine üslûb-ı sâbık üzere on dört sekbânların mütekā‘id Mehmed nâm yoldaş serdâr nasb ü ta‘yîn olunmağın işbu mektûb tahrîr ve irsâl olunmuşdur, vusûlünde gerekdir ki merkūmu serdârlık umûrunda istihdâm edip âharı umûruna müdâhale etdirmeyesiz ve ol cânibde vâki‘ yeniçeri ve cebeci ve topçu ve toparabacısı ve gılmân-ı acemî ve sekbân süvârî ve kuloğulları merkūmu üzerlerine serdâr ve zâbit bilip sözünden taşra ve re'yinden hâric vaz‘ ü hareket eylemeyip itâ‘at üzere olalar ve tavâif-i mezbûrûndan bilâ-veled-i ma‘rûf fevt olanların muhallefât ve metrûkâtların ma‘rifet-i şer‘le merkūma ahz u kabz ve sûk-ı sultânîde fürûht ve hâsıl olan nükūdu mümzâ ve mahtûm müfredât defterleriyle taraf-ı beytülmâla irsâl etdirdesiz, lâkin hilâf-ı şer‘-i şerîf ferd-i vâhid[e] gadr ve ta‘addî etdirmeyip mûceb-i mektûb ile âmil olasız, bâkī-i eyyâm şerî‘at dâim bâd. Tahrîr[en] evâhir-i şehr-i Şevvâl sene semân ve ışrîn ve mi'e ve elf. Hacı Hasan Ser-sekbânân-ı Dergâh-ı âlî hâlâ.