Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 87 Hüküm no: 62 Orijinal metin no: [16a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ömer Ağa'nın Kartal köyündeki mahzen, dükkân ve arsa hisselerini Saltana ile Samaltine'ye satması Medîne-i Üsküdar’da Hâce Hatun mahallesi sâkinlerinden Ömer Ağa b. Receb nâm kimesne meclis-i şer‘-i şerîf-i enverde işbu bâ‘iseteyi’s-sifr Saltana bt. Panayot ve Samaltine? bt. Mitro nâm Nasrâniyeler muvâcehelerinde bi-tav‘ihî ikrâr ve takrîr-i kelâm edip akd-i âti’z-zikrin sudûruna değin silk-i mülkümde münselik olup medîne-i mezbûreye muzâfe Adalar nâhiyesine tâbi‘ Kartal nâm karyede vâki‘ bir tarafı Yanaki nâm zimmî mülkü ve bir tarafı kal‘a duvarı ve bir tarafı Kiryakoz zimmî mülkü ve bir [tara]fı tarîk-i âm ile mahdûd bir bâb mülk mahzen ve bir dükkân ve bir mikdâr arsa-i hâliyede olan sülüs hisse-i şâyi‘amı tarafeynden îcâb ve kabûlü hâvî ve şürût-ı müfsideden ârî bey‘-i bâtt-ı sahîh-i şer‘î ile bi-safkatin vâhidetin yetmiş beş guruşa mezbûretân Saltana ve Samaltine’ye ale’l-iştirâki’s-seviyy bey‘ ve teslîm ve temlîk eylediğimde onlar dahi ber-vech-i muharrer iştirâ ve tesellüm ve temellük ve kabz ve kabûl eylediklerinden sonra semeni olan meblağ-ı merkūm yetmiş beş guruşu müşteriyetân-ı mezbûretân yedlerinden tamâmen ahz u kabz eyledim, min-ba‘d zikr olunan mahzen ve dükkân ve arsa-i hâliyede olan sülüs hisse-i şâyi‘ada benim kat‘â alâka ve medhalim kalmadı, mezbûretân Saltana ve Samaltine’nin mülk-i müşterâları ve hakk-ı sırflarıdır, keyfe mâ teşâân ve tahtârân mutasarrıfetân olsunlar dedikde gıbbe’t-tasdîki’ş-şer‘î mâ-vaka‘a bi’t-taleb ketb olundu. Fi’l-yevmi’l-hâmis aşer min-Zilka‘deti’ş-şerîfe li-sene hamse ve selâsîn ve mi'e ve elf min-hicreti men-lehü’l-izzü ve’ş-şeref. Şuhûdü’l-hâl: Halil Ağa b. Mehmed, Mustafa Beşe b. Mehmed Serdâr, Zâbıta Mehmed Ağa b. el-Hâc Halil Ağa, es-Seyyid İsmail Çelebi b. Musli, İbrahim Çelebi b. Mehmed Kâtib, İbrahim Çelebi b. Ahmed, İsmail Çelebi b. Şahin, Veli Beşe b. Ali, Hacı Ebubekir b. Halil, Diğer İbrahim Çelebi b. Mehmed Berber ve gayruhum.