Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 98 Hüküm no: 84 Orijinal metin no: [20a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Canetti v. Mihal'in Kartal köyündeki bağını Halil ve Osman'a satması Halil ve Osman’ın mülknâmesidir. Medîne-i Üsküdar muzâfâtından Adalar nâhiyesine tâbi‘ Kartal nâm karye sâkinlerinden Canetti v. Mihail nâm zimmî meclis-i şer‘-i şerîfde işbu râfi‘ânü’l-kitâb Halil ve Osman ibneyn Aşir nâm kimesneler mahzarlarında ikrâr-ı tâm ve takrîr-i kelâm edip akd-i âti’z-zikrin sudûruna değin silk-i mülkümde münselik olup karye-i mezbûre toprağında vâki‘ bir tarafdan Ahmed Çelebi bağı ve bir tarafdan ba‘zen Çavuşoğlu ve ba‘zen Danyel zimmî bağları ve bir tarafdan Hürmüz nâm zimmî bağı ve bir tarafdan tarîk-i âm ile mahdûd tahmînen dört dönüm bir kıt‘a kürûmî mülk bağımı mezbûrân Halil ve Osman’a ale’l-iştirâki’s-seviyy tarafeynden îcâb ve kabûlü hâvî bey‘-i bâtt-ı sahîh-i şer‘î ile otuz kıt‘a esedî guruşa bey‘ ve teslîm ve temlîk eylediğimde onlar da ber-vech-i muharrer iştirâ ve tesellüm ve temellük ve kabz ve kabûl eylediklerinden sonra semeni olan meblağ-ı mezbûr otuz kıt‘a esedî guruşu müşteriyân-ı mezbûrân yedlerinden tamâmen ahz u kabz eyledim, ba‘de’l-yevm bağ-ı mahdûd-ı mezkûr mezbûrânın mülk-i müşterâları ve hakk-ı sırflarıdır, benim kat‘â alâka ve medhalim kalmadı, keyfe mâ yeşâ ve yahtâr mutasarrıfân olsunlar dedikde gıbbe’t-tasdîki’ş-şer‘î mâ-hüve’l-vâki‘ bi’t-taleb ketb olundu. Fi’l-yevmi’l-ışrîn min-Cemâziyelâhire li-sene ışrîn ve mi'e ve elf. Şuhûdü’l-hâl: Abdurrahman Ağa b. el-Hâc Ali, Mustafa Beşe b. Mehmed, Mehmed Efendi [b.] Mustafa el-Mukayyid, Mahmud Çavuş b. Emrullah, Hüseyin Beşe b. Ebubekir.