Kartal Mahkemesi 1 Numaralı Sicil (H. 1128-1133 / M. 1716-1721) cilt: 62, sayfa: 102 Hüküm no: 90 Orijinal metin no: [21a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Soğanlık köyünden Mustafa'yı yaralayan Ahmed'in suçunun sabit olduğu Medîne-i Üsküdar muzâfâtından Adalar nâhiyesine tâbi‘ Soğanlık nâm karye sâkinlerinden bâ‘isü hâze’l-kitâb Mustafa b. Süleyman nâm kimesne meclis-i şer‘-i şerîfde yine karye-i mezbûre sâkinlerinden Ahmed b. Veli nâm kimesne mahzarında üzerine da‘vâ ve takrîr-i kelâm edip mezbûr Ahmed târîh-i kitâbdan bir gün mukaddem ba‘de’l-mağrib karye-i mezbûre hâricinde Anbarcıkuyusu nâm mahâlde bi-gayri hakkın bıçak ile sol bazumun üstünden bir yerine darb ve mecrûh eyledi, suâl olunup mûceb-i [şer‘îsi] icrâ olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan ber-vech-i muharrer müdde‘âsını mübeyyine beyyine taleb olundukda udûl-ı ahrâr-ı ricâl-i Müslimînden Veli b. Habib ve Osma[n] b. Kaytas nâm kimesneler li-ecli’ş-şehâde meclis-i şer‘a hâzırân olup istişhâd olunduklarında fi’l-vâki‘ merkūm Ahmed vech-i muharrer üzere târîh-i kitâbdan bir gün mukaddem mahâll-i merkūmede bizim huzûrumuzda müdde‘î-i merkūm Mustafa’nın bi-gayri hakkın bıçak ile sol bazusunun üzerinden bir yerine darb ve mecrûh eyledi, bizim ma‘lûmumuzdur, biz bu husûsa bu vech üzere şâhidleriz, şehâdet dahi ederiz deyü her biri edâ-i şehâdet-i şer‘iye eylediklerinde gıbbe ri‘âyeti şerâiti’l-kabûl şehâdetleri makbûle olmağın bi-hasebi’ş-şer‘i’ş-şerîf cerâhât makūlesinde i‘tibâr hâle olmayıp belki makāle? olmağın hükm-i şer‘î yerine tevkīf birle mâ-vaka‘a bi’t-taleb ketb olundu. Fi’l-yevmi’s-sâdis ve’l-ışrîn min-Cumâdelûlâ li-sene ışrîn ve mi'e ve elf. Şuhûdü’l-hâl: Mustafa Ağa [b.] Abdullah, Mahmud Çavuş [b.] Abdullah, el-Hâc Mehmed [b.] Halil, İbrahim Bey [b.] Ali, Mehmed Çelebi [b.] Ahmed el-Müezzin, Mehmed Çelebi [b.] Süleyman, Halil Çelebi [b.] Hüseyin, Osman Beşe [b.] Mustafa, Hüseyin Beşe b. Mehmed.